Հունվարի 1-ին 25 500 դրամից ցածր կենսաթոշակ ստացող չի լինի. Դա վերաբերում է նաեւ որոշ նպաստների

Կառավարությունն իր այսօրվա՝ նոյեմբերի 29-ի նիստում հավանություն տվեց կառավարության մի շարք որոշումներում փոփոխությունների նախագծին, որով առաջարկվում է 2019-ի հունվարի 1-ից բարձրացնել կենսաթոշակների եւ նպաստների չափը:

Հարցը ներկայացրեց Աշխատանքի եւ սոցիալական հարցերի փոխնախարար Արսեն Մանուկյանը՝ նշելով, որ այս նախաձեռնության նպատակը կենսաթոշակառուների, ծերության, հաշմանդամության եւ կերակրողին կորցնելու դեպքում նպաստ ստացողների շրջանում ծայրահեղ աղքատությունը հաղթահարելն է։

Նա նշեց, որ ի կատարում «Պետական նպաստների մասին» ՀՀ օրենքի, սահմանված են ծերության, հաշմանդամության, կերակրողին կորցնելու դեպքում նպաստների չափերը, որոնք կազմում են.

1) ծերության նպաստի չափը՝ 16 000 դրամ.

2) հաշմանդամության նպաստի չափերը՝

ա. 1-ին խմբի հաշմանդամի եւ հաշմանդամ երեխայի համար՝ 21 500 դրամ,

բ. երկրորդ խմբի հաշմանդամի համար՝ 19 000 դրամ,

գ. երրորդ խմբի հաշմանդամի համար՝ 16 000 դրամ.

3) կերակրողին կորցնելու դեպքում նպաստի չափը՝ 16000 դրամ։

Պարենային (ծայրահեղ) աղքատության գիծը 2019 թվականին կանխատեսվում է 25 500 դրամ։

Հաշվի առնելով վերը նշվածները եւ կենսաթոշակառուների,ծերության, հաշմանդամության, կերակրողին կորցնելու դեպքում նպաստառուների շրջանում ծայրահեղ աղքատությունը բացառելու նպատակադրումը՝ առաջարկվում է համապատասխան փոփոխություններ կատարել ՀՀ համապատասխան որոշումներում:

Ներկայացվող նախագծով առաջարկվում է պարտադիր ժամկետային զինվորական ծառայության շարքային կազմի զինծառայողի հաշմանդամության զինվորական կենսաթոշակի չափը երրորդ խմբի հաշմանդամի համար (18 000 դրամ) եւ պարտադիր ժամկետային զինվորական ծառայության շարքային կազմի մահացած (զոհված) զինծառայողի ընտանիքի անդամի կերակրողին կորցնելու դեպքում զինվորական կենսաթոշակի չափը (24000 դրամ), ծերության, հաշմանդամության, կերակրողին կորցնելու դեպքում նպաստների չափերը սահմանել 25 500 դրամ։

Սահմանվում է նաեւ, որ որոշումն ուժի մեջ է մտնում 2019 թվականի հունվարի 1-ից։

Նախագիծն ընդունվելու դեպքում 25 500 դրամից պակաս կենսաթոշակ ստացող կենսաթոշակառու, իսկ «Պետական նպաստներ մասին» ՀՀ օրենքով սահմանված ծերության, հաշմանդամության, մեկ կերակրողին կորցնելու դեպքում նպաստները 2019 թվականի հունվարի 1-ից կվճարվեն 25500 դրամի չափով:

«Սա շատ կարեւոր նախաձեռնություն է, փաստորեն, հունվարի մեկից սոցիալական առումով խոցելի խմբերը, որոնք մինչեւ այժմ ստանում են 16 հազար դրամ, 19 հազար դրամ, հունվարի մեկից կստանան 25 հազար 500 դրամ. սա այն նվազագույն գումարն է, որ անհրաժեշտ է մարդուն չսովելու համար»,-ասաց Արարատ Միրզոյանը: