Նիկոլ Փաշինյանը խոսել է առաջիկա ներդրումային ծրագրերի մասին
Այսօր Հայաստանում 500 մլն դոլար և ավելի ներդրումային ծրագրեր են քննարկվում, Լոռու մարզկենտրոն Վանաձորում նախնտրական հանդիպման շրջանակներում ասաց վարչապետի պաշտոնակատար Նիկոլ Փաշինյանը:
“Ես երեկ խոսում էի մեր պոտենցիալ ներդրողների հետ, ասում էի՝ մի կողմից ուզում եմ ասել ներդրումային ծրագրերի մասին, բայց մյուս կողմից էլ պատկերացնո՞ւմ եք վաղը չանենք, վերջում խայտառակ կըլնենք: Նրանք ասում են՝ դուխով ասա, անելու ենք, տարբերակ չկա: Երեք ներդրողներից մեկը, որը նաև աշխարհի երկու-երեք երկրում գործարան ունի, ասաց՝ ուրիշ բան որ չլինի, ընդեղ կփակեմ, կբերեմ ըստեղ կբացեմ, ընենց որ դուխով ասա”,- նշեց նա:
Փաշինյանն ասաց, որ ուզում է այն ներդրումային ծրագրերը ներկայացնել, որոնց ուղղությամբ ներդրողների հետ խոսակցություններ է ոնեցել վերջին 4 օրերի ընթացքում: Երևանում Հայէլեկտրոմեքենա գործարանի տարածքը հայ ներդրողն արդեն վերցրել է և մտադիր է այնտեղ մեքենաշինական ոլորտի արտադրութուն ստեղծել: Դա ենթադրում է մի քանի հարյուր աշխատատեղի ստեղծում:
Հաջորդ ներդրումային ծրագիրը՝ Հայաստանում հիմնադրվելու է արևային պանելների արտադրություն: Ըստ Փաշինյանի՝ այս գործարանի ստեղծման համար անհրաժեշ սարքերն ու սարքավորումներն արդեն ներկրվել են Հայաստան և պահեստավորված են: Մնում է, որպեսզի կառավարությունը տարածքը տրամադրի, մոտ 600 աշխատատեղով գործարանը կառուցվի:
“Կոտայքի մարզում երեկ չէ առաջին օրը ներդրողներից մեկը մոտեցավ ինձ և ասաց, որ ադամանդագործության ոլորտում ադամանդի մշակման գործարան ունի և հիմա մեծ ներդրում է անում և 2000-ի չափ նոր աշխատատեղ է ստեղծեվելու: Արթիկում երեկ մենք քննարկում էինք կարի գործարանի բացումը, որտեղ նախատեսվում է 200 աշխատատեղի ստեղծում: Արթիկում նախատեսվում է նաև հիմնել վերելակների գործարանի արտադրություն: Գյումրիում, եթե ամեն ինչ պլանավորվածի պես գնա, դեկտեմբերին կարի նոր մեծ արտադրամաս կբացվի”,- ասաց ՆԻկոլ Փաշինյանը:
Ըստ նրա՝ դեկտեմբերին Լոռու մարզում ժամանակակից գազի բալոնների արտադրություն է հիմնվելու՝ մոտ 150 աշխատատեղով:
“Նկատի ունեմ՝ այս պրոցեսն արդեն սկսել է, գնում է: Դեկտեմբերին նախատեսվում է Մերձավանում բացել Հայաստանում կենցաղային տեխնիկայի արտադրության առաջին գործարանը՝ հայկական բրենդով հեռուստացույցներ ու կենցաղային տեխնիկա են արտադրելու: Այս միտումը պետք է վերափոխի Հայաստանի տնտեսության կառուցվածը: Մեր երկիրը պետք է լինի ոչ թե ուղղակի հանքարդյունաբերող երկիր, այլ պետք է լինի արդյունաբերական, բարձր տեխնոլոգիական երկիր”,- ասաց Նիկոլ Փաշինյանը:
Ներդրումները խրախուսելու առաջին քայլը, նրա խոսքով, հարկային օրենսդրության բարելավումն է: