Հայ մարմնամարզիկների հաջող մեկնարկն աշխարհի գավաթի խաղարկությունում

Գերմանիայի Գոթբուս քաղաքում մեկնարկել է սպորտային մարմնամարզության այս տարվա աշխարհի գավաթի խաղարկության վերջին` ութերորդ փուլը: Հայտնում է ՀԱՕԿ-ի մամուլի ծառայությունը: Մասնակիցները մեդալների համար պայքարում են միայն առանձին գործիքների վրա:

Հայաստանի չորս պատվիրակներից գերազանց մեկնարկով առանձնացավ նժույգթափերի փորձառու վարպետ Հարություն Մերդինյանը:

Նա առաջ անցավ բոլոր մրցակիցներից, վաստակեց 14,966 միավոր և առաջին արդյունքով մտավ եզրափակիչ ` լավագույն ությակ: Երկրորդ ցուցանիշն ունեցավ նույն մրցաձևից աշխարհի այս տարվա չեմպիոն և ոսկե մեդալակիր, չինացի Վանգ Հաոն (14.900 միավոր):

Արթուր Թովմասյանn օղակների վրա վաստակեց 14.733 միավոր և հինգերորդ արդյունքով նույնպես եզրափակչում է: Նրա թիմակից Վահագն Դավթյանը եզրափակեց ուժեղագույն տասնյակը:

Արթուր Դավթյանը ուժերը փորձում է բոլոր վեց գործիքների վրա, Բայց մեդալների համար առավել լուրջ պայքար կմղի իր նախասիրած հենացատկում, որի մեկնարկը կտրվի այսօր: