Փաշինյանը թույլ տվեց արտաքին քաղաքական հերթական սխալը
Պաշտպանության նախկին փոխնախարար Արտակ Զաքարյանը Facebook -ի իր էջում գրառում է արել` քննադատելով վարչապետի պաշտոնակատար Նիկոլ Փաշինյանի վարած արտաքին քաղաքականությունը: Խոսքը մասնավորապես երեկ ՀՀ վարչապետի պաշտոնակատարի՝ ասուլիսում հնչեցրած խոսքերն են եղել Ադրբեջանում հայտնված տավուշցի Կարեն Ղազարյանի մասին:
«Հիմա շատ է խոսվում, որ Ադրբեջանն առաջարկում է բոլորը բոլորի հետ փոխանակել։ Մենք պետք է գնա՞նք դրան, իսկ մենք հարցրե՞լ ենք այն երկու ընտանիքներին… Այդ մարդիկ, հիմա մեկը ցմահ ազատազրկման է դատապարտված Արցախի Հանրապետությունում, մյուսը՝ 20 տարի ազատազրկման, որովհետև նրանք երկու հոգի, այդ թվում՝ պատանի տղայի, տան մեջ սպանել են։ Այդ ադրբեջանցիները, ովքեր կոնկրետ երկու մարդ սպանել են, մի հոգու վիրավորել։ Մենք հիմա համաձայնվո՞ւմ ենք, հա՞, ևս երկու Ռամիլ Սաֆարո՞վ ենք վերադարձնում Ադրբեջան։ Համաձա՞յն ենք այս տարբերակին»,- հարցադրումներ էր արել Փաշինյանը։
«Վարչապետի պաշտոնակատարը թույլ տվեց արտաքին քաղաքական հերթական սխալը: Խոսելով Ադրբեջանում գերեվարված Հայաստանի քաղաքացիներին փոխանակելու մասին, նա ասաց, որ չի կարելի նրանց դիմաց ազատ արձակել երկու Ռամիլ Սաֆարովի: Խոսքը 2014թ. Արցախում վնասազերծված ադրբեջանցի երկու դիվերսանտների մասին է, որոնցից մեկին Արցախի Հանրապետության դատարանը դապարտել է ցմահ, մյուսին՝ 22 տարվա բանտարգելության:
Փաշինյանը ճիշտ կաներ, եթե ասեր, որ այդ դապարտյալներին ներում շնորհելու կամ Ադրբեջանում պահող հայ գերիների հետ նրանց փոխանակման հարցը Հայաստանի իշխանությունների իրավասությունից դուրս է, Բաքուն պետք է փորձի համաձայնության գալ Արցախի Հանրապետության իշխանությունների հետ:
Դրա փոխարեն Փաշինյանն իր վրա վերցրեց ադրբեջանցի դիվերսանտների հետագա ճակատագրի տնօրինման պատասխանատվությունը և առիթ տվեց, որպեսզի Ադրբեջանը միջազգային հարթակներում շարունակի պնդել, որ իր քաղաքացիները«Հայաստանի պատանդն են»: Հերթական վրիպումն էր»,- գրել է Զաքարյանը: