Խնդրում եմ այս անգամ կողմ քվեարկեք, հրատապ հարց է. Գալուստ Սահակյանը մերժեց Հրաչյա Հակոբյանի խնդրանքը

«Գովազդի մասին» Հայաստանի Հանրապետության օրենքում լրացումներ և փոփոխություններ կատարելու մասին օրենքի նախագիծը դրվեց քվեարկության:

Վարման կարգով ձայն խնդրեց նախագծի հեղինակ «Ելք» խմբակցության պատգամավոր Հրաչյա Հակոբյանը. «Քանի որ Սամվել Ֆարմանյանի օրինագիծը դուրս եկավ քվեարկությունից, կարծում եմ՝ լավ առիթ է այս օրինագիծը ընդունենք, Գալուստ Գիգորիչ ջան խնդրում եմ այս անգամ քվեարկեք կողմ, կարծում եմ հրատապ է այս հարցը, քանի որ տեսնում եք՝ տոտալիզատորների գովազդները խեղդում են»:

Հիշեցնենք, որ նախորդ նախագծերը ԱԺ-ն չընդունեց Գալուստ Սահակյանի ձեռնպահ քվեարկության պատճառով:

Այս նախագիծը 52 կողմ քվեարկությամբ ևս չընդունվեց, ինչը խորհրդարանում իրարանցում առաջացրեց:

ԱԺ փոխնախագահ Միքայել Մելքումյանը հորդորեց ևս մեկ անգամ քվեարկել:

ՀՀԿ-ական Էդուարդ Շարմազանովը նշեց՝ եթե տեղից որևէ մեկը չի ասել, որ իր կոճակը չի աշխատել, ուրեմն կարիք չկա վերաքվեարկելու: «Պետք է գիտակցել, որ սա շատ կարևոր օրենք է: Մի հատ էլ դնենք, ինչ կարիք կա»,-կրկնեց Մելքումյանը:

Շարմազանովը կրկին պնդեց, թե չեն կարող դնել: ԱԺ նախագահ Արա Բաբլոյանն էլ ասաց, թե կողմ է վերաքվեարկության դնելուն, այն դեպքում, եթե մի պատգամավոր ասի, որ սխալ է տեղի ունեցել: «Եթե չի հայտարարել, ուրեմն պրինցիպիալ չի ուզել քվեարկել: Ես չեմ կարող ճնշել պատգամավորներին»,-ասաց նա:

Վարման կարգով ձայն խնդրեց Վահե Էնֆիաջյանը՝ նշելով, որ ըստ էության խորհրդարանում անկարևոր հարցեր չեն քվեարկվում: «Առաջիկայում ընտրություններ են լինելու և այս իրավիճակը, այս մթնոլորտն անընդունելի է՝ գալ, նստել դահլիճում և բնականոն գործընթացը խաթարել:

Գիտակցում ենք, որ երեք տարբերակ կա քվեարկության նաև չորրորդը կա՝ չքվեարկել: Միքայել Մելքումյանի դիտարկումը բնականոն ռեժիմին անցնելու հետ է կապված»,-ասա նա: