на Русском
ՃՏՊ՝ Հայկավան-Բամբակաշատ ավտոճանապարհին
Տեղի է ունենում ՀՀ ԱԺ արտահերթ նիստ․ Ուղիղ
Հուսով եմ, որ գալիք խորհրդարանում դուք կշարունակեք հետամուտ լինել խնդրի կարգավորմանը. Ֆարմանյան
Ինչպես էլ փաթեթավորենք, աշխարհում խնդրի ռադիկալ կարգավորման բարեհաջող փորձեր կան. «Վիճակախաղերի մասին» ՀՀ օրենքը ուժը կորցրած ճանաչելու մասին» օրենքի նախագծի քննարկման ամփոփիչ ելույթում այս մասին ասաց «ՀՀԿ» խմբակցության պատգամավոր Սամվել Ֆարմանյանը՝ օրինակ բերելով Իսրայելը:
Ըստ Ֆարմանյանի՝ այս կարևոր նախագիծը, ցավոք, չունի քաղաքական այն աջակցությունը, որը կարող էր դրան օրենքի ուժ տալ:
«Ամբողջ հարցը վերաբերում է նրան, որ խնդիրներն իրենց լուծելու ճիշտ ժամանակն ունեն, երբեմն այդ խնդիրները ոչ մեկ քայլ առաջ, ոչ էլ մեկ քայլ հետո հնարավոր չի լինում լուծել»,-ասաց Ֆարմանյանը և նշեց, որ հիասթափված է, որ նախագիծը չի ստանալու բավարար աջակցություն:
«Բայց ես շատ հուսով եմ, որ գալիք խորհրդարանում դուք կշարունակեք հետամուտ լինել խնդրի կարգավորմանը իսկ ես լռելյայն, առանց այդ մասին բարձրաձայնելու, պարզապես ամեն անգամ, երբ մամուլում տեղեկություններ կհայտնվեն այս խնդրի հետ կապված հանցագործությունների կամ դժբախտ դեպքերի, մարդկային խեղված ճակատագրերի մասին, ես ձեզ ֆեյսբուքյան «մեսենջերով» լռելյայն կուղարկեմ այդ դեպքերի մասին տեղեկություններ»,- դիմելով «Ելք» խմբակցության պատգամավոր, նախագծի հիմնական ընդդիմախոսներից Ալեն Սիմոնյանին՝ ասաց Ֆարմանյանը:
Սամվել Ֆարմանյանը նաև անդրադարձավ Ալեն Սիմոնյանի այն դիտարկմանը, թե ներկայացված նախագիծը քինախնդրության փորձ է գործող իշխանության հանդեպ: «Ես Ձեզ ասել եմ, պարո՛ն Սիմոնյան, ես դա համարում եմ անձնական վիրավորանք, ինձ պետք է շատ վատ ճանաչել՝ նման եզրակացություն անելու համար»,- ասաց նա:
Օրենքի նախագծի ապագայի հետ կապված նա ասաց, որ առավել քան վստահ է, որ մի օր հայաստանյան որևէ կառավարություն ստիպված է լինելու գնալ խնդրի կարգավորման ռադիկալ ճանապարհով:
Վերջում Ֆարմանյանը ևս մեկ տպավորությամբ կիսվեց. «Ինձ մոտ իսկապես տպավորություն է, որ բոլոր իշխանություններն անխուսափելիորեն անցնում են նույն ճանապարհով, երբ կառավարության պաշտոնյաներն ամեն ինչ անում են՝ հիմնավորելու մի բան, որը գրեթե հնարավոր չէ հիմնավորել, երբ հայտնվում են մարդիկ, որոնք փորձում են տվյալ իշխանությանը մատուցել աննկարագրելի արջի ծառայություն, և այդպես, պարո՛ն Սիմոնյան, ծնվում է իշխանությունների մշտական սինդրոմը, երբ դահլիճից դուրս կա մեկ այլ իրականություն, բայց դահլիճում այս կամ այն պատճառով փորձ է արվում ստեղծել լրիվ այլ իրականություն»,-ասաց նա և շնորհակալություն հայտնեց նման շահագրգիռ քննարկման համար:
Ֆարմանյանի դիտարկմանն անդրադարձավ Ալեն Սիմոնյանը և նշեց, որ որևիցե մեկին վիրավորելու որևիցե ցանկություն չի եղել: «Ես ուրախ եմ Ձեր մոտեցման համար և առաջարկում եմ միանալ այն նախագծին, որը ներկայացվել է իմ, «Ծառուկյան» դաշինքի և ՀՅԴ-ի կողմից, ես շատ շնորհակալ կլինեմ, եթե միանաք այդ նախագծին»:
Ֆարմանյանը նշեց, որ երեկվա քննարկումների ժամանակ ճիշտ կարծիք հայտնվեց, որ եթե չի ստանալու աջակցություն՝ նախագիծը պետք է քվեարկությունից հանել: Նա նշեց, որ դա չի անի, իրացնելով իրավունքը՝ կխնդրի դնել նախագիծը քվեարկության: «Որպեսզի մեզանից յուրաքանչյուրն իր քվեարկությունը, ինչպիսին էլ այս լինի, իր հետ որպես հուշ տանի այս խորհրդարանից»,- ասաց նա:
