Հլու-հնազանդ կատարել ենք բոլոր 19 կետերը. ծանրամարտի հավաքականի մարզիչը դոպինգային սկանդալի մասին

Անցնող մարզական տարին է ամփոփել այսօր ՀՀ ծանրամարտի հավաքականի գլխավոր մարզիչ Փաշիկ Ալավերդյանը: Նա նախ՝ խոսել է աշխարհի անցած առաջնության մասին, մասնավորապես անդրադարձել Անդրանիկ Կարապետյանի անհաջողության պատճառներին: Ալավերդյանն ասել է, որ դա բոլորի համար հանելուկ էր, սակայն, իր կարծիքով, մարզիկի մոտ բարձր ճնշում է գրանցվել նախավարժանքի ժամանակ, քանի որ քթից արյուն է հոսել:

Այդ պահին, մարզչի խոսքով, անհնար էր և՛ մրցումներից հրաժարվելը, և՛ պատվիրված քաշը իջեցնելը: Փաշիկ Ալավերդյանը նաև տեղեկացրել է, որ հաջորդ ամիս Անդրանիկ Կարապետյանը Կատարում կմասնակցի աշխարհի գավաթի մրցաշարին և մեծ հույսեր կան, որ միավորներ կվաստակի Օլիմպիադային մասնակցության համար:

Ամփոփելով տարին՝ մարզիչն ասել է, որ ամբողջ մրցաշրջանի ընթացքում Հայաստանի տարբեր տարիքային խմբերի հավաքականները տարբեր մրցաշարերում նվաճել են ընդհանուր թվով 73 մեդալ և դրանք ավելին կլինեին, եթե մեր հավաքականը մասնակցեր նաև մեծահասակների Եվրոպայի առաջնությանը: Ալավերդյանը հիշեցրել է, որ այդ ժամանակ հավաքականը դեռ որակազրկված էր, սակայն մինչև տարեվերջ կատարել է ֆեդերացիայի կողմից իր առջև դրված բոլոր պարտավորությունները:

«19 կետ էր, հլու-հնազանդ ու սրբորեն կատարել ենք բոլոր 19 կետերն էլ, դրա համար միջազգային ֆեդերացիան մեզանից գոհ է և թույլ տվեց, որ մենք ժամանակից շուտ, այսպես ասած, ազատ արձակվենք և մասնակցենք ցանկացած միջազգային մրցումների»,- հայտարարել է Փաշիկ Ալավերդյանը:

Բաժանորդագրվեք SHANTNEWS.am-ին Telegram-ում