Կարծում եմ, որ քաղաքական փոփոխությունների բովանդակության մի մասը արտահայտել եմ այս ամբիոնից, որպես պատգամավոր. Փաշինյան
Հայաստանում տեղի ունեցած փոփոխությունների խաղաղ, թավշյա բնույթը այդ գործընթացում ներգրավված միայն մեկ կողմի վաստակն ու ձեռքբերումը չէ: Շատ գործընթացներ ԱԺ-ում են ստացել քաղաքական լուծում: Լարված պահերին բավական կառուցողական և հավասարակշռող դերակատարում է ունեցել նաև ԱԺ նախագահը:
Ազգային ժողովում կառավարության անդամների հետ հարցուպատասխանի ժամանակ նման տեսակետ հայտնեց ՀՀ վարչապետի պաշտոնակատար Նիկոլ Փաշինյանը:
«Շնորհակալություն եմ հայտնում Արա Բաբլոյանին ԱԺ նախագահի կարգավիճակում նրա գործունեության համար: Լարված պահերին դուք բավական կառուցողական և հավասարակշռող դերակատարում եք ունեցել: Եվ ես այդ պահվածքը, մոտեցումը շատ բարձր եմ գնահատում: ԱԺ-ում կառավարման, տնտեսվարման ձևի մեջ կատարվել են փոփոխություններ, որոնք ես տեսել եմ որպես ԱԺ պատգամավոր»,- ասաց Փաշինյանը:
Արա Բաբլոյանը նկատեց, որ ԱԺ-ի վերջին նիստերն են: Նա հետաքրքրվեց, թե արդյոք վարչապետի պաշտոնակատարի կարծիքով այս ժամանակում ԱԺ-ն կարողացել է գնահատել, դասեր քաղել և բարեփոխումներ իրականացնել: «Արդյոք դուք կարծում ենք, որ 6-րդ գումարման ԱԺ-ն ինչ-որ նշանակություն ունեցավ մեր երկրի, պատմության համար»,-հարցրեց ԱԺ նախագահ Բաբլոյանը:
«Անկախ գնահատականներից, միանշանակ է, որ 6-րդ գումարման Ազգային ժողովը պատմական ԱԺ է: Ըստ էության, այսօր և նախկինում էլ շատերն աննախադեպ են համարում այն քաղաքական փոփոխությունները, որ տեղի ունեցան Հայաստանում: Եվ ես մեկ անգամ չէ, որ ասել եմ, որ այդ փոփոխությունների խաղաղ, թավշյա բնույթը միայն դրանում ներգրավված մեկ կողմի վաստակն ու ձեռքբերումը չէ:
Մենք ի վիճակի եղանք գործընթացները տեղափոխել ԱԺ և այստեղ այդ գործընթացներին տալ քաղաքական լուծում: Ուզում եմ այդ ամենի վերաբերյալ իմ գնահատանքը արտահայտել 6-րդ գումարման ԱԺ-ի, բոլոր պատգամավորների, ԱԺ նախագահի գործունեության վերաբերյալ»,- ասաց նա ու նշեց, որ այդ առաքելությունը պատմության մեջ դեռ կգնահատվի:
Փաշինյանը նկատեց, որ ուղիղ մեկ տարի եղել է պատգամավոր: «Ինձ համար էլ այս ԱԺ-ն շատ կարևոր է, որովհետև կածում եմ, որ քաղաքական փոփոխությունների բովանդակության մի մասը արտահայտել եմ այս ամբիոնից, որպես պատգամավոր, դեռ 2017-ի ամռանը: Ես այն ժամանակ այս ամբիոնից առաջին անգամ ասացի, որ եթե 2018-ի ապրիլ-մայիսին ժողովուրդը որոշի իր կամքն արտահայտել, մենք կլինենք երաշխավորը, որ այդ կամքը դառնա քաղաքական իրողություն»,-ասաց վարչապետի պաշտոնակատարն ու հավելեց, որ ինքն ուրախ է, որ կարողացել են կատարել ժողովրդի առաջ ստանձնած այդ պարտավորությունը:
Փաշինյանը բոլոր պատգամավորներին հաջողություն մաղթեց ընտրություններում, իսկ չմասնակցողներին հաջողություն՝ իրենց հետագա ծրագրերում: