Կրթական ոլորտի ղեկավարի զավակը գնացել է մասնավոր դպրոց, դա նույնն է, որ մեր պաշտպանության նախարարի որդին ծառայի օտար բանակում.ԿԳ նախարար
Ինչպիսին պետք է լինի ՀՀ-ում կրթությունը՝ ներառական և արդար, և այն, ինչ արել ենք այս 6 ամիսներին, միտված է դրան. ԱԺ-ում 2019 թվականի բյուջեի նախագծի քննարկման ժամանակ ասաց կրթության և գիտության նախարարի պաշտոնակատար Արայիկ Հարությունյանը:
Ըստ նրա՝ որակյալ կրթությունը պետք է հասանելի լինի բոլորին, ոչ թե փոքր խմբերին, որոնք ունեն հնարավորություններ:
«Ինչ ենք ունեցել նախկինում, ունեցել ենք ոլորտի մարդիկ, ովքեր առաջնորդվել են բացառապես իրենց անձնական շահերով: Կրթական ոլորտի ղեկավարի գործունեության արդյունքը վատ առումով եղել է այն, որ այդ ղեկավարի զավակը գնացել է մասնավորի դպրոց: Դա, ըստ էության, նույնն է, որ մեր պաշտպանության նախարարի զավակը ծառայի օտար բանակում, նույնն է, որ առողջապահության նախարարը մինիմալ առողջապահական կարիքները հոգա օտար երկրներում: Սա է եղել կրթության վիճակը, և ես ուրախությամբ պետք է ասեմ, որ վեց ամսում հաջողվել է լուրջ քայլեր անել»,-ասաց նա:
Ըստ Արայիկ Հարությունյանի՝ երբեմն որոշ քննադատներ ասում են, որ ապաքաղաքկանացումը դարձրել են իրենց հիմնական դրոշակը. «Բա ի՞նչ անենք, եթե ստիպում եք ուսուցչին ընտրությունից ընտրություն նվաստանալ, ընտրություններին՝ կեղծել ու հետո գլուխը կախ գնալ քաղաքացի կրթելու, պետք է ապաքաղակացնենք կրթությունը, որն անմիջապես ազդում է որակի վրա: Հեգնանքով ասում եք՝ կոռուպցիայի դեմ պայքարն եք դարձրել դրոշակ, բա ի՞նչ պետք անենք՝ դպրոցից, բուհից մկան նման կրող որոշ կազմակերպիչներ չե՞ն ազդում կրթության որակի վրա, բա ի՞նչ են անում»,-ասաց նա:
Նա նաև անդրադաձավ Հայ եկեղեցու պատմության դասաժամերի վերանայման մասին բարձրաձայնումներին: Ըստ նրա՝ անընդհատ շեշտելով տարբեր թեմաներ, այդ թվում նաև ԼԳՏՊ և այլն, փորձում են դիսկուրս փոխել: «Այո՛, Հայ եկեղեցու պատմությունը և այլ առարկաներ լուրջ վերափոխման կարիք ունեն, և այս էժան մանիպուլյացիաները, որոնք էլ էժան վերնագրերի են վերածվում երրորդական լրատվամիջոցների կողմից, այո, մեզ խանգարում են, բայց մենք ունենք մեր նպատակը, խանգարելով հանդերձ՝ մենք առաջ ենք գնալու»,-ասաց նա:
Ռազմահայրենասիրական դաստիարակության մասին խոսելով՝ Ա. Հարությունյանն ասաց, որ այլևս դպրոցներում չեն լինելու խմբակներ, որոնց տրվում են հարյուր միլիոնավոր դրամներ բյուջեից, որտեղ գովերգվելու են «տուշոնկայով հարստացած նախկին զինվորականներ»:
«Սա չի լինելու, և թող չշահարկեն, որ տարբեր խմբակների գումարները կտրել են, կտրել ենք ու տալու ենք այլ նպատակների համար, որ ՀՀ քաղաքացի դաստիարակվի»,-ասաց նա:
Նախարարը վերջում էլ հավելեց, որ ուսուցիչների աշխատավարձերը բարձրացվելու են վերապատրաստման շնորհիվ: