2019թ. բյուջեի նախագծով պաշտպանության ոլորտի և ՊՆ բյուջետային հատկացումներն ավելացել են. Կորյուն Նահապետյան
Արտասովոր պայմաններում ենք քննարկում: Արձակված ԱԺ-ն իր սահմանադրական պատասխանատվության շրջանակում ուղղակի պարտավոր է քննարկել երկրի համար կարևորագույն այս փաստաթուղթը, և, կարծես, կա պատրաստակամություն ոչ միայն քննարկելու, այլև ընդունելու հաջորդ տարվա համար կարևորագույն ոչ միայն ֆինանսական, այլև քաղաքական այս փաստաթուղթը:
Ազգային ժողովում 2019թ.-ի բյուջեի նախագծի քննարկմանն ասաց ՀՀԿ խմբակցության պատգամավոր, պաշտպանության և անվտանգության հանձնաժողովի նախագահ Կորյուն Նահապետյանը: Ըստ նրա՝ հանձնաժողովում փակ կարգով քննարկվել են ոլորտի հարցերը, հնչել են կոնկրետ մտահոգություններ:
Կորյուն Նահապետյանի ներկայացմամբ՝ 2019 թ.-ի բյուջեի նախագծով պաշտպանության ոլորտի և Պաշտպանության նախարարության բյուջետային հատկացումներն ավելացել են, պաշտպանության ոլորտի համար ավելացումը կազմում է 65 մլրդ դրամ, իսկ Պաշտպանության նախարարության համար 38 մլրդ դրամ: Պաշտպանության ոլորտի առումով հատկացումներն ընդհանուր պետական բյուջեի 20%-ն են, ՀՆԱ-ի՝ 4%-ը»:
«Որքան էլ միջոցներն ավելացել են, այդուհանդերձ բազմաթիվ ծրագրեր իրականացնելու համար պահանջվում են ավելի շատ միջոցներ»,-ասաց Նահապետյանը՝ թվական տվյալներ չներկայացնելով, բայց ասաց, որ հնարավոր ռազմական գործողությունների սկսման արդյունքում հնարավոր են նաև վերաբաշխումներ:
«Բնականաբար, մենք միշտ պետք է պատրաստ լինենք հնարավոր հաջորդ պատերազմին»,-ասաց նա: Թե ինչպիսի ծախսային ուղղություններով են ավելացել հատկացումները ոլորտում, Նահապետյանը թվարկեց, որ առաջինը սպառազինության և ռազմական տեխնիկայի միջոցների ձեռքբերումն է, հիմնանորոգումն ու տեխնիկական սպասարկումը:
«Այստեղ ավելացումներն ուղղված են հրթիռահրետանային սպառազինության, հակաօդային պաշտպանության ռազմական կարիքներին և այլ միջոցներից»,-ասաց նա: Ըստ պատգամավորի՝ ՌԴ-ի հետ կնքած պետական արտահանման վարկային համաձայնագրի շրջանակներում ավելանում են հրթիռային կարողությունները, հայրենական ռազմարդյունաբերության ոլորտում նախատեսվել է զարգացնել հավակնորդ ծրագրեր, որոնց իրագործումն ընդլայնելու է ՀՀ ԶՈւ որակային պատրաստվածությունը:
Հնարավոր ռազմական գործողությունների և բյուջետային հատկացումների մասին խոսելով՝ նա ասաց, որ ձեռք են բերում սպառազինության այնպիսի տեսակներ, որոնք հնարավոր կլինեն ոչ միայն ռազմական ագրեսիային դիմակայելու, այլև պաշտպանությունը լիարժեք իրականացնելու: Նահապետյանը նաև ասաց, որ սպաների բնակարանային ապահովության խնդիրը դեռևս անորոշ է մնում:
«2019թ. բյուջեի նախագծի պետական գաղտնիք պարունակող ծախսերը օրինական են և հիմնավորված»,-ասաց նա: Ի դեպ, որպես վերջին ելույթ, Կորյուն Նահապետյանը շնորհակալական խոսք ասաց ոլորտի անձանց, այն մարդկանց, ովքեր հավատացել են, վստահել են, ընտրել են, նաև Արցախի ռազմական իշխանությանը: