Մեր գործունեության հիմքում աշխատանքի խրախուսման քաղաքականությունն է. Նիկոլ Փաշինյան

Վարչապետի պաշտոնակատար Նիկոլ Փաշինյանը 2019 թ. պետական բյուջեի նախագիծն իներցիոն է համարում, որովհետև այն հիմնված է պարամետրերի վրա, որոնք իրենք ստացել են որպես ժառանգություն: Նոյեմբերի 13-ին խորհրդարանում պետբյուջեի նախագծի քննարկման ժամանակ Փաշինյանը հայտնեց, որ ընթացիկ քաղաքական քննարկումների և որոշումների ազդեցություններն այս փուլում նախագծում հաշվի առնված չեն, ինչը չի նշանակում, որ ցանկացած պահի դրանք հաշվի չեն առնվի և չեն ներառվի: Վարչապետի պաշտոնակատարն ընդգծեց, որ բյուջետային իրենց քաղաքականության մեջ տեղի են ունեցել էական և շրջադարձային փոփոխություններ:

«Բյուջետային մեր քաղաքական և տնտեսական ռազմավարությունը կարելի է անվանել աշխատանքի խրախուսման քաղաքականություն, որովհետև մեր գործունեության հիմքում հենց այդ տրամաբանությունն է դրված»,- ասաց նա` մասնավորեցնելով, որ այս հարցը կարևոր նշանակություն ունի:

Փաշինյանն ասաց, որ իրենց քաղաքական գործունեության ողջ ընթացքում հանրային փոփոխության կարևորագույն պայման են համարում անհատական ջանքը, այսինքն` երկրում հանրության մեջ չեն կարող տեղի ունենալ փոփոխություններ, եթե դրանց հիմքում ընկած չէ անհատական ջանքը:

«Երբ մենք մինչև այժմ սովորաբար ասել ենք տնտեսական աճ, զարգացում, նկատի ենք ունեցել, որ ինչ-որ տեղից խորհրդավոր մարդիկ կամ ընկերություններ պետք է գան և զարգացնեն պետությունը, կառավարությունն էլ զբաղվի դրանց հետ հարաբերությունների կարգավորմամբ, ապա մենք տնտեսական աճ ասելով նկատի ենք ունենում համընդհանուր ջանքի մեկտեղում, մեզ համար կարևոր է, որ Հայաստանում տնտեսական աճի կառուցվածքը փոխվի այնպես, որ դա լինի ներառող: Մեր քաղաքականության խնդիրն է` յուրաքանչյուր անհատի համար ստեղծել տնտեսական գործունեությամբ զբաղվելու իրական հնարավորություն: Մենք այսօր, ըստ էության, համարում ենք, որ քաղաքական մակարդակում այդ խնդիրը լուծել ենք. Հայաստանում այլևս չկան մենաշնորհներ, տնտեսական գործունեության սահմանափակումներ, ներմուծման և արտահանման արգելքներ, և, ըստ էության, սրանով քաղաքական նախապայմանները և տնտեսական նախապայմանների մի մասն ապահովված է: Առաջիկայում մեզ համար կարևորագույն խնդիրը լինելու է հենց տնտեսական նախապայմանների և պայմանների ապահովումը, որ տնտեսական գործունեության յուրաքանչյուր ձև լինի հնարավորինս մատչելի»,- ասաց նա:

Ըստ Փաշինյանի` աշխատանքի խրախուսման կարևորագույն որոշումն է «միկրոբիզնես» հասկացության սահմանումը, միկրոբիզնեսն ընդհանրապես ազատված կլինի բոլոր հարկերից, այսինքն` տարեկան 20 – 24 մլն դրամի շրջանառություն ունեցող բիզնեսը չի վճարի ոչ մի հարկ: Վարչապետի պաշտոնակատարն ընդգծեց` որոշակի սահմանափակումներ կլինեն` կապված ոլորտների հետ, կլինի նաև գոտիականության խնդիր, այս քաղաքականությամբ կփորձեն հատկապես մարզերում խրախուսել տնտեսական գործունեությունը:

Կառավարության ղեկավարն ասաց, որ, ըստ էության, կա երկու մոտեցում, որ իրենք այս միկրոբիզնեսով զբաղվող և իրենց կարիքները հոգալ չկարողացող կամ խնդիրներ ունեցող մարդկանց ասեն` գիտեք ինչ, մենք ընտրություններից առաջ ձեզ «կօգնենք», ընտրակաշառք կբաժանենք կամ ինչ-ինչ այլ մեթոդներով կաջակցենք, սակայն իրենք այլ ճանապարհ են ընտրում, հնարավորություն են ստեղծում, որ մարդիկ կարողանան աշխատանքի միջոցով ապահովել իրենց ընտանիքի բարեկեցությունը:

«Կարևոր է ընդգծել, որ միկրոբիզնեսի համար կլինի հնարավորություն, որ մինչև 3 աշխատող ունենալու պարագայում նրանց համար եկամտահարկի այլ ռեժիմ կգործի, այսինքն՝ այդ աշխատողները 5000 դրամի հաստատագրված վճարով կարող են լուծել եկամտահարկի խնդիրը»,- ասաց նա: