ՀՀԿ-ն բացառություններ է սահմանել Փաշինյանի կառավարության գործունեությանը չխոչընդոտելու հայտարարության մեջ
Ապրիլին Երևանում ու մարզերում անցկացված ցույցերի պահանջն էր՝ թույլ չտալ Սերժ Սարգսյանին պաշտոնավարել որպես վարչապետ, քանի որ դա դիտվում էր որպես իշխանություն լինելու երրորդ ժամկետի հավակնություն։ Բայց Սարգսյանի հրաժարականից հետո ցուցարարները փոխեցին իրենց պահանջների բնույթը։ ՀՀԿ հայտարարության նախագծի մեջ այսպիսի գնահատականներ են տրվում Հայաստանում տեղի ունեցած իշխանափոխությանը։
«… Բողոքի ակցիաների կազմակերպիչները փոխեցին իրենց պահանջների բնույթը` առաջ քաշելով «Նիկոլ՝ վարչապետ» կարգախոսը»,- նշվում է փաստաթղթում։
Այդ օրերին, ըստ հանրապետականների, խաթարված էին կենսական նշանակության մի շարք ենթակառուցվածքների աշխատանքն ու գործառույթները։ Իսկ Ազգային ժողովի վրա գործադրվում էր ճնշում, ՀՀԿ առանձին պատգամավորների նկատմամբ՝ անձին ու ընտանիքին վիրավորական ու սպառնալից հայտարարություններ։
Այդ պայմաններում ՀՀԿ-ն, ըստ հայտարարության, ԱԺ-ում Փաշինյանի առաջադրման առաջին անգամը նրան չսատարեց, որպեսզի հնարավորություն տա այլ ուժերին նույնպես թեկնածու առաջադրել պատգամավորների 1/3 ձայներով, եթե այդպիսի ցանկություն լիներ։ Սակայն դա չեղավ, և երկրորդ փուլում հանրապետականներն ընտրեցին Փաշինյանին ու խոստացան չխոչընդոտել նրա կառավարության գործունեությանը՝ բացառություններով։
«… Բացառությամբ մատնանշված մի շարք ուղղությունների, որոնցով կուսակցությունն ունի սկզբունքային սահմանափակումներ (անվտանգություն, Արցախյան հիմնախնդիր, արտաքին քաղաքական վեկտորի փոփոխություն), Հանրապետական խմբակցությունը չի խոչընդոտի, անհրաժեշտության դեպքում նույնիսկ կաջակցի կառավարության օրինաստեղծ գործունեությանը: Նշված մոտեցումը կյանքի է կոչվել թե՛ կառավարության ծրագիրը, թե՛ կառավարության առաջարկած օրինագծերը քննարկելիս»,- նշվում է հայտարարության մեջ։