ԱԺ տնտեսական հանձնաժողովը քննարկում է նախագիծ, որը կբացահայտի հանքերի իրական սեփականատերերին

ԱԺ Տնտեսական հարցերի մշտական հանձնաժողովում քննարկման էր ներկայացվել «Հայաստանի Հանրապետության ընդերքի մասին օրենսգրքում փոփոխություններ և լրացումներ կատարելու մասին» օրենքի նախագիծը:

Հիմնական զեկուցող ՀՀ էներգետիկ ենթակառուցվածքների և բնական պաշարների նախարարի տեղակալ Վարդան Գևորգյանը նշեց, որ փոփոխությամբ պահանջվում է իրական սեփականատերերի վերաբերյալ տեղեկություններ բովանդակող քաղվածք՝ իրական սեփականատերերի հայտարարագրի կամ իրական սեփականատերերի վերաբերյալ փոփոխված տեղեկությունների վերաբերյալ քաղվածք Հայաստանի Հանրապետության իրավաբանական անձանց պետական միասնական գրանցամատյանից:

«Մենք շատ ենք կարևորում այս փոփոխությունը, որովհետև սրա արդյունքում ունենալու ենք առավել թափացիկ կառավարվող հանքարդյունաբերություն, որն իր նպաստն է բերելու ոլորտի զարգացմանը»,-ասաց նա:

ԱԺ փոխխոսնակ, «Ծառուկյան» խմբակցության պատգամավոր Միքայել Մելքումյանը նկատեց, որ ուրախալի են փորձերը՝ բացահայտելու իրական հանքարդյունաբերողին: «Որովհետև մեծ ծավալի ընդերք է հանվում, արտահանման ծավալներն ենք ավելացրել, և եթե բախնտներս բերել է՝ պղնձի գները բարձրացրել են, պղնձից գերշահույթներ են ստացել, բայց դրանից ոչ թե պետությունն է գերշահույթ ունեցել, այլ տվյալ սեփականատերը: Եթե նման նախաձեռնություն է գալիս, ուրեմն իրական սեփանատերը հայտնի չէ»,-ասաց նա և հարց ուղղեց փոխնախարարին, նշելով, թե փոքր երկիր ենք, գուցե գիտեն թե իրական սեփականատերերն ովքեր են: Նա նաև հարցրեց, թե 10-15 տարում ինչքա՞ն գումարներ են հոսել դեպի դուրս:

Մելքումյանը նաև հարցրեց, թե չե՞ն մտածում արդյոք փոփոխելու այն հարկային մեխանզիմը, որ դրված է պղնձի հանքանյութի արդյունահանման և խտանյութի ձեռքբերման բնօգտագործման վճարի հարցում: «Ի՞նչ ռեզերվներ կան, որ կարողանանք ի շահ պետության, այդ չափը ճշգրտվի, որովհետև համեմատ շահույթներին, չնչին գումար է ստացվում այդ չափը»,-ասաց նա:

Թե ովքեր են իրական սեփականատերերը, փոխնախարարն ասաց, որ այսօր այդպիսի տեղեկություն չունեն և հայտնի են այն ՍՊԸ-ները, որոնք պետական ռեգիստրում գրացվածներն են: «Բայց գիտեք, որ բազմաթիվ ընկերության սեփականատերեր օֆշորային գոտում են գրացված, և սեփականատերը անհայտ է: Գործող օրենսդրությամբ՝ մինչև 10 տոկոս բաժնեմաս ունեցողների անունները պետք է ստանանք, բայց դա բավարար չէ, որովհետև որոշ ժամանակ անց փոփոխություն է լինում և չեն գրանցվում: Հիմա փոփոխություն է արվում, որ այն տեղեկությունը, որ չունենք, ստանանք»,-ասաց նա:

Գումարների արտահոսքի մասին էլ ասաց, որ եթե շահույթով հաշվեն, միգուցե ՊԵԿ-ը կարողանա որոշ տվյալներ ասել, բայց նախարությունը չի կարող ասել:

Ինչ վերաբերում է բնօգտագործման վճարին՝ հարկային փոփոխություններ, ըստ նրա, անհրաժեշտ են, որպեսզի ավելի ճկուն դարձնեն: «Քանի որ կան հանքավայրեր, կապված հանքավայրի մեծությունից, հանքանյութի տեսակետից, տնտեսական գնահատակաները փոփոխվում են և պետք է ունենանք ճկուն տարբերակներ և ֆիքսված տարբերակը քննարկման կարիք ունի»,-ասաց նա: