«Գալա» կուսակցությունը չի մասնակցի արտահերթ խորհրդարանական ընտրություններին
«Գալա» կուսակցության վարչությունը որոշել է չմասնակցել արտահերթ խորհրդարանական ընտրություններին: Այս մասին Tert.am-ի հետ զրույցում ասաց «Գալա» կուսակցության վարչության անդամ, Գյումրու ավագանու «Գալա» խմբակցության ղեկավար Արմենուհի Վարդանյանը:
«Իմ անձնական կարծիքով` կուսակցությունը ծնունդ առավ 2016 թվականին` Գյումրու ՏԻՄ ընտրություններին ընդառաջ և մենք հայտարարել ենք, որ մեր պայքարը Սերժ Սարգսյանի ռեժիմի դեմ էր, մեր պայքարը լավ Հայաստան ունենալն էր, ազատ ինքնիշխան ժողովրդավարական երկիր ունենալն էր և մենք, ստեղծելով կուսակցություն, հայտարարեցինք, որ ստեղծում ենք ևս մի լծակ, որը կօգնի մեզ հասնել մեր նպատակների իրականացմանը»,-ասաց նա և նշեց, որ հիմա իրավիճակը փոխվել է և գոնե հայտարարությունների մակարդակով նոր իշխանությունները նշում են, որ փոփոխություններ են իրականացնելու, ըստ որի Հայաստանը լինելու է ազատ երկիր, որտեղ մարդն է լինելու գերագույն արժեք:
«Կարծում եմ, որ այս պահին ավելին արած կլինենք, եթե թույլ չտանք անօրինականություն, որ հին բարքերի մուտք լինի իշխանական համակարգ, թույլ չտանք որ կրկնվեն նախկին ռեժիմի սխալները և այն չմատուցեն մեզ նորովի»,-ասաց նա:
Հարցին՝ հնարավո՞ր է, որ ընդհանրապես կուսակցությունը լուծարվի, Արմենուհի Վարդանյանն ասաց, որ կուսակցությունը լուծարելու խնդիր չկա: «Մենք մանդատ ենք ստացել գյումրեցիներից նախորդ ընտրությունների ժամանակ, «Գալա» խմբակցությունը ակտիվորեն աշխատում է, պարզապես այս փուլում չենք մասնակցում խորհրդարանական ընտրություններին, բայց դա չի նշանակում, որ մենք խնդիր ենք դնում լուծարել կուսակցությունը»,-ասաց նա: