Իրաքի մի քանի տարածքներում զանգվածային գերեզմաններ են հայտնաբերվել

Նախկինում «Իսլամական պետություն» ահաբեկչական կազմակերպության վերահսկողության ներքո գտնվող Իրաքի մի քանի տարածքներում զանգվածային գերեզմաններ են հայտնաբերվել: Այս մասին հայտնում է Reuters-ը:

Հայտնաբերված գերեզմանները, ընդհանուր առմամբ, 202-ն են եղել: Ներկա պահին ուսումնասիրված է դրանցից ընդամենը 28-ը, որտեղից 1258 մարդու աճյունամասեր են հայտնաբերվել:

Հաղորդվում է, որ զանգվածային գերեզմանոցները գտնվում են երկրի 4 շրջաններում՝ Նայնավա, Քիրքուկ, Սալահ էդ-Դին և Անբար: Գտնվել են ինչպես կանանց, այնպես էլ երեխաների, ծերերի ու հաշմանդամների դիեր: Հայտնաբերվել են նաև քաղաքական գործիչների ու ոստիկանների մարմնամասեր:

Մասնագիտական մոտավոր հաշվարկներով՝ բոլոր գերեզմանահորերում, ընդհանուր առմամբ, կարող է 6-12 հազար դի լինել: Հստակ թիվ, սակայն, դեռևս չի նշվում, դա պարզ կլինի համապատասխան ուսումնասիրությունից հետո միայն: Նշվում է, որ հայտնաբերված ամենափոքր գերեզմանահորում 8 մարդու աճյուն է հայտնաբերվել, ամենամեծում զոհերի թիվը հասել է 4 հազ-ի:

ՄԱԿ-ում այս իրադարձությունները գնահատել են որպես բռնարարության լայնամասշտաբ ու համակարգված իրագործման ծրագիր: Հայտարարվել է, որ դեպքի հետաքննման գործում պետք է բացառել կողմնակի որևէ ազդեցություն, քանի որ ուսումասիրությունների արդյունքում հնարավոր կլինի բացահայտել ինչպես ռազմական հանցագործությունները, այնպես էլ մարդկության դեմ գործած հանցագործությունների և, ինչպես նշվում է, հնարավոր ցեղասպանության իրականացման վերաբերյալ հարցը:

Հիշեցնենք, որ «Իսլամական պետություն» ահաբեկչական կազմակերպության զինյալներն Իրաքի որոշ տարածքներ սկսեցին շրջափակել դեռևս 2014 թվականի ամռանը: Դրան հաջորդող 3 տարում խմբավորման անդամները զանգվածային սպանություններ էին իրականացնում տեղի ազգային ու կրոնական փոքրամասնությունների, այդ թվում՝ եզդիների շրջանում:

Երկարատև պայքարից հետո՝ 2017 թվականին, Իրաքի վարչապետ Հեյդար ալ-Աբադին հայտարարեց «Իսլամական պետություն» խմբավորման դեմ տարած վերջնական հաղթանակի մասին՝ այդուհանդերձ նշելով, որ խմբավորման կողմից սպառնացող վտանգը դեռևս շարունակում է առկա լինել: