Աննա Հակոբյանի այցից հետո ուղղաթիռ իրոք իջել է Արթիկում, հյուրեր ենք ունեցել, դա ոչ մեկին չի վերաբերվում. Green food ՍՊԸ-ի ջերմոցների տնօրեն

Անցյալ շաբաթ համացանցում հերթական բանսարկության փորձ արվեց, որի կենտրոնում ՀՀ վարչապետի պաշտոնակատար Նիկոլ Փաշինյանի տիկինն էր՝ Աննա Հակոբյանը,- գրում է Armtimes.com-ը:

Լրատվամիջոցներից մեկը լուր տարածեց թե «արթիկցիները զարմացած եւ զայրացած են ահավոր: Նորանկախ Հայաստանի պատմության մեջ առաջին անգամ արթիկցիները «ուղղաթիռ են տեսել». անցած 30 տարիների ընթացքում Արթիկ այցելել են բոլոր նախագահներն ու վարչապետները, սակայն նրանցից ոչ մեկի մտքով չի անցել, որ այդ 105 կմ տարածությունը կարելի է ուղղաթիռով «հաղթահարել»։

Իր այցն Արթիկ ուղղաթիռով կազմակերպած վարչապետի պաշտոնակատարի տիկին Աննա Հակոբյանը, որ գնացել էր ընկերուհու ջերմոցում ելակի «արտադրությունը» դիտելու, Հայաստանի տնտեսության «թռիչքաձեւ աճը» անձամբ իր աչքերով տեսնելու-ճաշակելու, պարզվում է՝ նաեւ փոքրիկ քաղաքական «մարդամոտությամբ» է արժեւորվել. ինչպես տեղեկացնում են արթիկցիները՝ ջերմոցատիրոջ որդու համար ՔՊ ցուցակով պատգամավորի անցողիկ տեղ ապահովելու նուրբ խնդիրը եւս չի շրջանցվել այցի ընթացքում»,- գրել էր պարբերականը «ասում են թե» խորագրի ներքո:

Իրականում ամենեւին բարդ չէր արթիկցիներին այդքա՜ն «զարմացրած ու զայրացրած» այդ «տեղեկությունը» ճշտել: ՀԺ-ի հարցմանն ի պատասխան՝ Հակոբյանի մամուլի խոսնակ Արփինե Զարգարյանը, անդրադառնալով մամուլի հրապարակմանն, ասաց հետեւյալը. «Լուրը հերքում եմ. ջերմոց գնացել են ավտոմեքենայով եւ վերադարձել են ավտոմեքենայով»:

«Տեղեկությունը» հերքել է նաեւ Green food ՍՊԸ-ի ջերմոցների տնօրեն Անդրանիկ Իգնատոսյանը: «Ես պաշտոնապես հերքում եմ, Աննա Հակոբյանը մեզ մոտ եկել է ծառայողական մեքենայով»,- ասել է տնօրենը: Լրատվամիջոցը, բնականաբար, դեռ չի էլ հերքել իր գրած «տեղեկությունը» եւ, բնականաբար, ներողություն չի խնդրել գոնե «զայրացած ու զարմացած» արթիկցիներից: Ու բնականաբար չի էլ փորձել ճշտել, թե իրականում ինչ է տեղի ունեցել:

Աննա Հակոբյանի այցից հետո ուղղաթիռ իրոք իջել է Արթիկում, եւ ուղեւորները այցելել են նույն ջերմոց: «Մասնավոր ուղղաթիռ է, եւ չեմ կարող ձեզ ինֆորմացիա տալ, թե ով է եղել մեջը, ոչ պաշտոնական հանդիպում է եղել, եւ հյուրեր ենք ունեցել, դա ոչ մեկին չի վերաբերվում: Դա եղել է Աննա Հակոբյանի այցից հետո»,- մեր զրույցում ասել է Green food ՍՊԸ-ի ջերմոցների տնօրենը: Եթե արթիկցիները իբր այդքան «զայրացած ու զարմացած են», եւ իբր երբեք ուղղաթիռ չեն տեսել, ապա նրանք թերեւս իրավունք ունեն իմանալու, որ ուղղաթիռով Արթիկ ժամանած հյուրերի մեջ եղել է ՀՀ նախկին վարչապետ, ԵԱՏՄ կոլեգիայի նախագահ Տիգրան Սարգսյանը: Դժվար է կռահել այդ «տեղեկությունը» հրապարակած լրատվամիջոցի դիրքորոշումը, թե միայն Աննա Հակոբյա՞նն է «զայրացնում ու զարմացնում» արթիկցիներին, թե՞ նաեւ այլ անձինք:

Մանրամասն՝ սկզբնաղբյուր կայքում