Որևէ երկրում չկա հանրային հեռուստաընկերություն, որ չներկայացնի այդ օրվա իշխանության որդեգրած քաղաքականությունը. Մարգարիտա Գրիգորյան

«Հիշեցնեմ, որ բազմիցս, այդ թվում նաև պարոն Ջանջուղազյանը խոսել են, որ «չարաշահումներ» տերմին գոյություն չունի: 2017թ. կա հարուցված քրեական գործ փաստի առիթով, դա չի նշանակում՝ հարուցվել է քրեական գործ Հ1-ի առիթով, այլ հարուցվել է փաստի առթիվ, որտեղ բերված է 3 կետ և քննության ընթացքում է: Երբ ավարտվի, դուք էլ կիմանանք»,- այսօր ԱԺ-ում՝ լրագրողների հետ զրույցում, ասաց Հանրային հեռուստաընկերության գործադիր տնօրեն Մարգարիտա Գրիգորյանը:

Հարցին, թե արդյո՞ք սպասվում են արդյոք պաշտոնանկություններ Հանրայինի ղեկավար կազմում, Մարգարիտա Գրիգորյանը պատասխանեց, որ պաշտոնանկություններ միշտ են հնարավոր, յուրաքանչյուր ոլորտում:

«Հանրային հեռուստաընկերության տնօրենին, եթե վերնախավ եք համարում, ասեմ, որ նման տեղեկություն չունեմ, իմ ենթակայության տակ աշխատողների մասին էլ չունեմ, բոլորն աշխատում են շատ լավ»,- ասաց նա:

Լրագրողներից մեկի այն դիտարկմանը, թե բոլոր ժամանակներում էլ ընդդիմությունը դժգոհում է լրատվական թողարկումներից, Գրիգորյանը պատասխանեց, որ որևէ երկրում չկա հանրային հեռուստաընկերություն, որ չներկայացնի այդ օրվա իշխանության որդեգրած քաղաքականությունը:

«Կա մի ճշմարտություն, դուք բոլորդ գիտեք, բայց շատ լավ շահարկում եք հարմար առիթով: Հանրայինը, ինչպես «Դոյչե վելեն», «Ֆրանս 24»-ը և այլն, հանրային լինելով, ունեն իրենց ճիշտ ուղղությունը: Որևէ երկրում չկա հանրային հեռուստաընկերություն, որ չներկայացնի այդ օրվա իշխանության որդեգրած քաղաքականությունը»,- նշեց Մարգարիտա Գրիգորյանը:

Նրա խոսքով՝ միշտ էլ կարելի է դժգոհել, սակայն հաճախ, չկարողանալով գտնել հաղորդումների համար հյուր ընդդիմադիր դաշտից, հաղորդումները չեն կայանում, նույնը վերաբերում է նաև ԱԺ ՀՀԿ խմբակցության պատգամավոր Արմեն Աշոտյանին, որը ևս բողոքել էր Հանրային հեռուստաընկերության քաղաքականությունից: