Ինչու է արձանագրվել տնտեսական ակտիվության ցուցանիշի անկում. Նիկոլ Փաշինյանը պարզաբանում է
«Այս տարվա սեպտեմբերին նախորդ տարվա սեպտեմբերի նկատմամբ արձանագրվել է տնտեսական ակտիվության ցուցանիշի անկում, չնայած տարեկան տնտեսական ակտիվության ցուցանիշով մենք ունենք 6,5 տոկոս աճ: Այս մասին, այսօր՝ նոյեմբերի 1-ին, ԱԺ-ում վարչապետի ընտրության հարցի քննարկման ժամանակ նշեց վարչապետի պաշտոնակատար, վարչապետի միակ թեկնածու Նիկոլ Փաշինյանը:
Տնտեսական աճի կառուցվածքը, որը երկար տարիներ արդեն գոյություն ունի երկրում, որևէ կերպ ընդունելի չի կարող համարվել: Մեր տնտեսական աճը հիմնականում ձևավորվում է այնպիսի բաղադրիչներից, որոնք հիմք են տալիս ասելու, որ մեր երկիրը ընդերքը քանդող և արտահանող, ագրարային և, ըստ էության, խաղադրույքներ իրականացնող երկիր է, ինչը որևէ կերպ ընդունելի չէ»:
Նա նկատեց, որ այս տարվա հունիսին տնտեսական ակտիվության ցուցանիշի աճը հասավ 11 տոկոսի միայն այն պատճառով, որ տեղի էր ունենում ֆուտբոլի աշխարհի առաջնություն և մարդիկ զանգվածաբար խաղադրույքներ էին կատարում: Փաշինյանը նշեց, որ դրանից հարկային եկամուտները չաճեցին, քանի որ այդ ոլորտը հարկվում է հաստատագրված վճարներով:
Հաջորդ բաղադրիչն, ըստ Փաշինյանի հանքարդյունաբերություն է, որը ՀՀ տնտեսության հենասյուներից մեկն է եղել. «Երբ մետաղների գները միջազգային շուկայում բարձր են եղել, մենք մեր ընդերքը քանդել, արտահանել ենք, հիմնականում խտանյութի տեսքով, և ըստ էության, հավելյալ արժեք չստեղծելով: Ուզում եմ ընդգծել, որ անկումը տեղի է ունեցել սեպտեմբերին: Տեղի է ունեցել հետևյալը. Թեղուտի հանքը, որը մեր արտադրության հենասյուն էր, փակվել է: Փակվել է դեռ փետրվարին: Մեր տնտեսության խնդիրներից մեկն այն է, որ մեկ ընկերության վիճակը կարող են տնտեսական ցուցանիշների տատանումների բերել: Մեր երկրում կան սեփականատերեր, որ եթե այդ օրը վատ տրամադրությամբ արթնանա, կարող են մեր տնտեսական ցուցանիշներն անկում ապրել»:
Երրորդ բաղադրիչը, ըստ Փաշինյանի, գյուղատնտեսությունն է, որտեղ սեպտեմբերին երկնիշ անկում է արձանագրվել. «Այս տարի 9 ամիսների արդյունքներով ոլորտում 20 տոկոս արտահանման աճ ենք ունեցել: Ոչ ոք չի կարող պնդել, որ այն թվերը, որ ներկայացվում են գյուղոլորտում, իրականությանը համապատասխանում են: Որովհետև մենք ունենք հավելագրումների բազմաթիվ մեխանիզմներ: Մեր երկրում կա այնպիսի զարմանալի երևույթ, ինչպիսին «ստվերային այգիներն» են: Դրա համար, երբ ծրագրում ենք ջրի սպառման ծավալները, տարվա կեսին պարզվում է, որ այդ ծավալները սպառվել են ու ոչ ոք չի կարողանում բացատրել, թե ուր է գնացել ջրի այդ քանակը:
Հաջորդը, ներկրում են սպիրտ ու որպեսզի ներկայացվի դա որպես հայկական կոնյակ, ներկայացվում են խաղողի կեղծ մթերումներ: Այսպիսով ունենում ենք թվերի անհամապատասխանություններ: Այս տարի ավելի խիստ ենք եղել և նաև դա է պատճառը, որ լուրջ անկում ունենք գյուղատնտեսության ոլորտում»:
Փաշինյանի խոսքով, այս գործոններն են ազդում թվերի վրա. «Կա ևս մեկ գործոն, բյուջեի նախագծի ծախսային մասի թերակատարման խնդիր: Պատճառը կապված է կոռուպցիայի դեմ պայքարի հետ, որովհետև բազմաթիվ ծրագրեր մեր կարծիքով իրականացվում են ոչ արդյունավետ և կոռուպցիայի դեմ պայքարը ստիպել է, որ ծրագիր իրականացնողները ավելի ուշադիր լինեն, զսպում են ծախսերը»: