ԱԱԾ և ՀՔԾ ղեկավարների գաղտնալսման գործով ԱԺ քննիչ հանձնաժողովը ներկայումս աշխատանքային հանդիպումների ռեժիմում է. Կոստանյան
ԱԱԾ եւ ՀՔԾ ղեկավարների գաղտնալսման գործով ԱԺ քննիչ հանձնաժողովը ներկայումս աշխատանքային հանդիպումների ռեժիմում է, որը հաջորդ չորեքշաբթի ավարտվում է, ինչից հետո հնարավոր է անգամ ամենօրյա ռեժիմով հանձնաժողովի նիստեր գումարվեն: Այս մասին այսօր՝ հոկտեմբերի 26-ին, ԱԺ-ում լրագրողների հետ զրույցում նշեց այդ հանձնաժողովի նախագահ, ՀՀԿ խմբակցության պատգամավոր Գեւորգ Կոստանյանը՝ անդրադառնալով հարցին, թե ինչու հանձնաժողովը նիստեր չի գումարում:
Հարցին, թե այս խորհրդարանը կհասցնի՞ քննել այդ գործը՝ հաշվի առնելով, որ շուտով ԱԺ նոր ընտրություններ են լինելու, Կոստանյանը պատասխանեց, որ մինչեւ դեկտեմբերի վերջը՝ նոր խորհրդարանի առաջին նիստի օրը, իրենք ժամանակ ունեն. «Մենք պետք է այնուամենայնիվ շատ ինտենսիվ գործընթացը առաջ տանենք, որովհետեւ դա բոլորիս է պետք՝ անկախ քաղաքական զարգացումներից կամ հետեւանքների»:
Կոստանյանը հստակ չնշեց, թե ովքեր են հրավիրվելու հանձնաժողովի նիստին. «Կա անձանց շրջանակ, որոնք ենթակա են հրավիրման, բայց յուրաքանչյուր հրավիրվածի անհրաժեշտությունն ու հաջորդականությունը բխում է մեկի տված տեղեկություններից: Այսինքն հստակ եւ սպառիչ ցանկ անձանց եւ հաջորդականության դժվար է ասել»,-ասաց նա՝ հավելելով, որ հնարավոր է՝ հրավիրվեն նաեւ ՀՔԾ պետն ու ԱԱԾ տնօրենը:
Դիտարկմանը, որ ԱԱԾ տնօրեն Արթուր Վանեցյանը հանտարարել է, որ արդեն հայտնի է գաղտնալսման պատվիրատուն, Կոստանյանն ասաց. «Քրեական գործի տվյալներին ծանոթ չեմ, որպեսզի կարողանամ ասել՝ բացահայտվել է, թե ոչ, բայց իհարկե, քրեական գործով ձեռք բերված ապացույցները կօգնեն, բայց դա մեզ չի էլ կաշկանդում: Կարող է քրեական գործով մեկ հետեւության հանգեն, բայց մեր հանձնաժողովը բոլորովին այլ եզրակացության կարող է հանգել: Թեեւ ես ՔԿ գործունեության նկատմամբ ունեմ վստահություն: կոնկրետ Քննչական կոմիտեի ղեկավար Հայկ Գրիգորյանը եւ իր ղեկավարած մարմնի նկատմամբ վստահություն ունեմ»:
Նա չբացառեց, որ Քննիչ հանձնաժողովի անդամները ներգրավված լինեն քարոզչական ու քաղաքական գործընթացների մեջ եւ չմասնակցեն հանձնաժողովի նիստերին. «Եթե քվորում չեղավ՝ 6 մարդ ներկա չեղա, որոշում չենք կարող կայացնել»: