«Ղեկը աջ» նախաձեռնությունն առաջարկում է աջ ղեկով մեքենաների արգելքը հանել մինչև 2020 թվականը
Այսօր ՀՀ տրանսպորտի, կապի և ՏՏ նախարարությունում տեղի է ունեցել «Ղեկը աջ» նախաձեռնության անդամների հետ հերթական հանդիպումը: Պայմանավորվածության համաձայն` այս անգամ հանդիպմանը մասնակցել են նաև խնդրի հետ առնչություն ունեցող գերատեսչությունների ներկայացուցիչները:
«Առաջարկում ենք օրենսդրական փոփոխություններ նախաձեռնվեն, որպեսզի աջ ղեկով մեքենաների արգելքը կասեցվի մինչև 2020 թվականը»,- հանդիպման ժամանակ ասել է «Ղեկը աջ» նախաձեռնության անդամ, փորձագետ Արթուր Միսակյանը:
Ըստ փորձագետի` թյուր են այն կարծիքները, թե աջ ղեկով մեքենաներ ներկրում են հիմնականում բիզնեսով զբաղվելու նպատակով:
«Հայաստանում չկա մեկ ներկրող, որը կարող է իրեն թույլ տալ 100 և ավելի մեքենա ներկրել»,- ասել է «Ղեկը աջ» նախաձեռնության անդամ, փորձագետ Արթուր Միսակյանը` հավելելով, որ մեքենաների 75 տոկոսը ներկրվում է անձնական օգտագործման համար, և միայն 25 տոկոսն է ավտոներկրողների կողմից ձեռք բերվում:
«Ղեկը աջ» նախաձեռնության անդամների խոսքերով` այս տարի Հայաստանում գնվել է 150-ից փոքր-ինչ ավելի մեքենա։ Այդ մեքենաները Բագրատաշենի անցակետում են, իսկ 2500 ավտոմեքենաներ՝ Վրաստանի տարբեր քաղաքներում։
Հիշեցնենք, որ ըստ «Ղեկը աջ» նախաձեռնության անդամների՝ խոսքը 3000 աջ ղեկով մեքենաների մասին է, որոնք կամաց-կամաց կուտակվում են սահմանին: Հայաստան աջ ղեկով մեքենաների ներկրումն արգելված է այս տարվա հոկտեմբերի 1-ից