Փաշինյանը անդրադարձել է Հունան Պողոսյանի կողմից Շանթ Հարությունյանին ծեծելու գործին
Արտահերթ խորհրդարանական ընտրությունները կհաղթահարեն այդ վակուումը: Լրագրողների հետ զրույցում այսօր ասաց վարչապետ Նիկոլ Փաշինյանը՝ անդրադառնալով հարցին, որ Ռոբերտ Քոչարյանը հայտարարում է, թե Հայաստանի քաղաքական դաշտում վակուում կա:
«Ընդհանրապես, քաղաքական դաշտում այսօր վակուում կա, բայց արտահերթ խորհրդարանական ընտրություններն ամեն ինչ կդնեն իրենց տեղը: Արտահերթ խորհրդարանական ընտրությունները նաև հենց դրա համար են, որ այդ վակուումը հաղթահարվի»,- նշեց ՀՀ վարչապետը:
«Ազատություն» ռ/կ-ին 2013 թվականին տված հարցազրույցում Նիկոլ Փաշինյանը հայտարարել էր, որ նախկին փոխոստիկանապետ Հունան Պողոսյանը ծեծել է Շանթ Հարությունյանին, սպառնացել ընտանիքին: Լրագրողների հետ զրույցում անդրադառնալով իր այս խոսքերին եւ Հունան Պողոսյանին Սյունիքի մարզպետ նշանակվելուն, ասաց.
«Շանթ Հարությունյանը ցուցմունքներ չի տվել այդ կապակցությամբ: Ես կարծում եմ՝ լավ առիթ է, որ նոր քննություն տեղի ունենա ու հույս ունենք՝ Շանթ Հարությունյանն էլ կհամագործակցի քննության հետ, որպեսզի մենք իրականությունը պարզենք: Այսօր այս թեմայով արդեն ես խոսել եմ իրավապահ մարմինների ներկայացուցիչների հետ ու ասել, որ անհրաժեշտություն կա այդ իրավիճակը նորից քննության առնել, եթե դրա հնարավորությունը կա, կարծում եմ՝ հնարավոր կլինի ստեղծել իրավական լուծումներ, որպեսզի ամբողջական քննություն ընթանա», - ընդգծեց ՀՀ վարչապետի պաշտոնակատարը։