Վտանգավոր բան չի լինի հին օրենսգրքով ընտրության գնալը. ՀՀԿ խմբակցության ղեկավար
Մենք կառավարության հետ պայմանավորվել ենք, որ կառավարության ներկայացուցիչների հետ քննարկենք մեր առաջարկությունները եւ այդ քննարկման արդյունքում մենք կկայացնենք որոշում: Այս մասին, այսօր՝ հոկտեմբերի 17-ին, ԱԺ-ում լրագրողների հետ զրույցում նշեց ՀՀԿ խմբակցության ղեկավար Վահրամ Բաղդասարյանը՝ անդրադառնալով Ընտրական օրենսգրքի փոփոխություններին:
«Մենք չենք շտապում, հանգիստ քննարկում ենք, որովհետեւ Ընտրական օրենսգիրքը հապճեպ ընդունելու օրենք չէ, դա հետագա բոլոր ընտրությունների ճակատագրի հետ կապված սահմանադրական օրենք է: Մենք պետք է կարողանանք շատ մանրակրկիտ քննարկել եւ նախկինում թույլ տված սխալները չկրկնել»,-ասաց նա:
Վահրամ Բաղդասարյանի խոսքով, պայմանավորվել են նաեւ, առաջինից երկրորդ ընթերցման ժամկետը երկարացվի, որ կարողանան նորմալ առաջարկություններ անել:
ՀՀԿ խմբակցության ղեկավարը չբացառեց, որ ընտրությունները կարող են լինել նաեւ գործող օրենսգրքով. «Վտանգավոր բան չի լինի հին օրենսգրքով ընտրության գնալը, իրենք էլ են դա նշում: Նախընտրելի է, որ Ընտրական օրենսգիրքը լինի այնպիսին, որ խոցելի չլինի, նաեւ կառավարության ծրագրում խոստացած կետերը իրականացվեն՝ ցուցակների մաքրում, ցուցակների կրճատում, տեխնիկական սարքերով հագեցում»: