Հիմնականում՝ կոնցեպտուալ բաների հետ ՀՅԴ-ի հետ համաձայնություն ունեցել ենք. Արարատ Միրզոյան (տեսանյութ)

«Հիմնականում՝ կոնցեպտուալ բաների հետ ՀՅԴ-ի հետ համաձայնություն ունեցել ենք: Եվ իրենց սրտով են օրենսգրքի բազմաթիվ դրույթներ: Կան մի քանի դրույթներ, որոնց հետ սկզբունքային հակասություն ունեն Դաշնակցության ներկայացուցիչները»,- խորհրդարանում հայտարարել է ՀՀ առաջին փոխվարչապետ Արարատ Միրզոյանը՝ հավելելով, որը ՀՅԴ-ն իր դիրքորոշումը հայտնելու է քվեարկությամբ:

Հարցին՝ որո՞նք են սկզբունքային հակասությունները, Միրզոյանը պատասխանել է.

«Խոսքն, այսպես կոչված, դասական համամասնական ընտրակարգի մասին է, երբ ցուցակը կա և մարդիկ քվեարկում են ցուցակը: Այսպես կոչված՝ համամասնական ռեյտինգային, երբ մեկ ընտրատարածքով ռեյտինգային է, այսինքն՝ էլի ընտրում ես կուսակցություն, բայց այդ մեկ քվեաթերթիկը դու կարող ես շրջել և 200 թեկնածուի մեջ կատարել նաև ռեյտինգային քվեարկություն: Սա, օրինակ, ամենասկզբունքայիններից մեկն էր», – պատասխանել է փոխվարչապետը:

Հարցին՝ արդյո՞ք առաջարկն ընդունելի էր իր համար, Միրզոյանն այսպիսի պատասխան է տվել.

«Ոնց որ թե ոչ: Այլ տեխնիկական բաների մասին էլ ենք խոսել և ընդհանուր եզրեր գտել ենք: Ես խոսում եմ կոնցեպտուալ տարբերությունների մասին: Այնուամենայնիվ, Դաշնակցությունը որոշ հարցերի շուրջ իր դիրքորոշումն ունի, ինչպես «Ծառուկյան» դաշինքը և ՀՀԿ-ն»,- հավելել է առաջին փոխվարչապետը, որը նաև ասել է, որ եկող երկուշաբթի՝ հոկտեմբերի 22-ին, խորհրդարանում արտահերթ նիստ է լինելու, որի ժամանակ առաջին ընթերցմամբ քվեարկության է դրվելու ԸՕ-ն:

Մինչ այդ էլի քննարկումներ կլինեն:

Ըստ Արարատ Միրզոյանի՝ քննարկման ժամանակ ՀՅԴ ներկայացուցիչները ևս մեկ անգամ ասել են, որ, իրենց կարծիքով , դեկտեմբերին արտահերթ ընտրություններ կազմակերպելը ճիշտ չէ:

«Մենք էլ ևս մեկ անգամ վերահաստատեցինք մեր դիրքորոշումը, համաձայն որի՝ դեկտեմբերին պիտի լինեն արտահերթ ընտրություններ՝ դեկտեմբերի առաջին կեսում: Երբ ասում են, որ ցանկալի ժամկետ չէ, դա դեռ չի նշանակում, որ փակվում է կոմպրոմիսային ընդհանուր տարբերակի գնալու հարցը: Կարող ենք ընդհանուր կոնեսուսի շրջանակներում ինչ-որ բան անել»,- ավելացրել է Միրզոյանը: