ՀՅԴ-ի ներկայացրած 3 առաջարկներն էլ մերժվել են Արարատ Միրզոյանի գլխավորած պատվիրակության կողմից
Արարատ Միրզոյանի գլխավորած կառավարական պատվիրակությունը մերժել է Դաշնակցության ներկայացրած Ընտրական օրենսգրքի փոփոխությունների 3 առաջարկն էլ՝ պատճառաբանելով, որ մինչև դեկտեմբերյան ընտրությունները հնարավոր չէ հասցնել կատարել այդ փոփոխությունները: Այս մասին հոկտեմբերի 16-ին, ԱԺ-ում լրագրողների հետ հարցազրույցում ասաց ՀՀ ԱԺ ՀՅԴ խմբակցության ղեկավար Արմեն Ռուսատամյանը:
Նա նշեց, որ հենց այդ պատճառով էլ ՀՅԴ-ն դեմ էր, որ ընտրություններն անցկացվեն դեկտեմբերին:
ՀՅԴ-ն Ընտրական օրենսգրքի փոփոխությունների՝ իրենց մեկ տասնյակից ավելի առաջարկներից առանձնացրել ու առաջին փոխվարչապետ Արարատ Միրզոյանի գլխավորած պատվիրակությանն է ներկայացրել այն 3-ը, որոնց շուրջ մինչ այդ՝ ամռան քննարկումների ժամանակ, համաձայնության էին եկել նաև այլ խմբակցությունների՝ այդ թվում«Ելքի» հետ:
Առաջին առաջարկը թեկնածուների ցանկերի բաց լինելու մասին է. այսինքն, համամասնական ընտրություն, որը հնարավորություն է տալիս ընտրել ոչ միայն կուսակցությունը, այլև թե այդ կուսակցությունից հատկապես ով պետք է մանդատ ստանա: «Սա աշխարհում ընդունված ամենաժողովրդավարական ձևն է: Սա չեն կարողանում ընդունել, որովհետև դրա համար ժամանակ է պետք»,-ասաց Արմեն Ռուստամյանը:
«Երկրորդ առաջարկն այն է, որ առավելագույն շեմը, որ տրված է՝ որևէ կուսակցություն 2/3-ից ավելի չի կարող մանդատ ունենալ, մենք առաջարկում ենք դա իջեցնել 3/5, պատճառաբանելով, որ սահմանադրական փոփոխությունները 2/3-ով է հնարավոր անել և աշխարհում ընդունված լավագույն պրակտիկան այն է, որ մեկ քաղաքական ուժ հնարավորություն չունենա միայնակ որոշել և Սահմանադրություն փոխել: Առնվազն այդ շեմը պետք է նվազեցվի, որ առնվազն մեկ այլ քաղաքական ուժի հետ համաձայնությամբ Սահմանդրությունը փոխի: Չնայած սա որևէ ձևով կապված չէ դեկտեմբերի հետ, բայց այս առաջարկն էլ ընդունելի չեղավ, երևի նպատակահարմարության խնդիր է»,-ասաց Ռուստամյանը:
ՀՅԴ-ի երրորդ առաջարկն այն է, որ երբ ընտրություններն ավարտվում են և բողոքարկող կողմն ասում է՝ կան կեղծիքներ, միշտ պատասխանը լինում է նույնը՝ եղել են կեղծիքներ, որոնք չեն ազդել ընտրությունների արդյունքի վրա: Դաշնակցությունն առաջարկում է եղանակ, որով արձանագրվեն ոչ միայն կեղծիքները, այլև դրանց ծավալը: Եվ այդ ծավալը հնարավորություն կտա փաստարկված, դատարանի միջոցով վիճարկել ընտրությունների արդյունքները: Այս առաջարկը նույնպես Արարատ Միրզոյանի գլխավորած պատվիրակությունը վերապահումով է մոտեցել ժամկետի հետ կապված:
«Ցանկացած առաջընթաց քայլ մենք ողջունել ենք, նախորդ Ընտրական օրենսգրքում մեզ համար ռեյտինգային ընտրակարգը անընդունելի էր, բայց քանի որ կար համախոհության մթնոլորտ, դա չխափանելու համար, գնացինք, վերապահումով քվեարկեցինք: Հիմա մենք, իհարկե, մեր տեսակետը կներկայացնենք, քանի որ ես հիմնավոր չեմ համարում, որ մինչև այդ համաձայնեցված փոփոխությունները հնարավոր չլինեն իրականացնել, քանի որ մինչև դեկտեմբերի հնարավոր չէ»,-նշեց Արմեն Ռուստամյանը:
Նախագծում կան նաեւ փոփոխություններ, որոնք Դաշնակցության համար ընդունելի են, օրինակ, ռեյտինգային ընտրակարգից հրաժարումը, ԱԺ մտնելու շեմի իջեցումը, գրավի իջեցումը եւ այլն: ՀՅԴ-ն հակված է ընտրությունների գնալ թեկուզ թերի, բայց նոր Ընտրական օրենսգրքով, քանի որ հինը միանշանակ անընդունելի է:
ՀՅԴ խմբակցության անդամների հետ հանդիպումից հետո առաջին փոխվարչապետ Արարատ Միրզոյանն ասաց, որ, իր տպավորությամբ, Դաշնակցական պատգամավորները հիմնական կոնցեպտուալ հարցերում համաձայն են փոփոխություններին, բայց կան որոշ դրույթներ, որոնց հետ սկզբունքային հակասություն ունեն եւ իրենց դիրքորոշումը կհայտնեն քվերակությամբ: