Ի՞նչ խնդիրներ է լուծում Ընտրական օրենսգրքում փոփոխությունների նախագիծը
Կառավարությունն այսօրվա արտահերթ նիստում հավանություն տվեց Ընտրական օրենսգրքում, Վարչական իրավախախտումների վերաբերյալ օրենսգրքում, «Հանրաքվեի մասին» և «Պաշտպանության մասին» օրենքներում փոփոխություններ և լրացումներ կատարելու օրենքների նախագծերի փաթեթին և որոշեց ներկայացնել Ազգային ժողով:
Արդարադատության նախարար Արտակ Զեյնալյանը, որ օրենսդրական փաթեթի բարեփոխումների կարևորագույն նպատակը Հայաստանում ժողովրդավարական ինստիտուտների կայացումն է:
Նախարարի խոսքից՝ այդ նպատակից ելնելով՝ մշակվել է Ընտրական օրենսգրքում և հարակից օրենքներում փոփոխություններ և լրացումներ կատարելու վերաբերյալ նախագիծ, որը ի թիվս այլ խնդիրների լուծում է հետևյալ խնդիրները.
. Թեկնածուների տարածքային ցուցակների վերացում, պարզ համամասնական ընտրակարգի ընդունում
. Կոալիցիաների ձևավորման սահմանափակումների վերացումն և ժամկետների ընդլայնում՝ 6 օրից փոխելով 10 օրվա
. Կուսակցական բազմակարծության ապահովման նպատակով ընտրվելու նվազագույն շեմի իջեցում՝ կուսակցությունների համար նախկին 5 տոկոսի փոխարեն 4-ի, իսկ դաշինքների համար 7 տոկոսի փոխարեն 6 տոկոս
. Ընտրագրավի գումարի իջեցում՝ ներկայիս նախատեսված նվազագույն աշխատավարձի 10 հազարապատիկի փոխարեն, 7500-պատիկի
. Ընտրագրավի գումարի վերադարձի շեմի իջեցում՝ կուսակցությունների համար ներկայիս գործող 4 և ավելի տոկոսի փոխարեն նախատեսվում է 2 և ավելի տոկոս
. Կանանց ներկայացվածության քվոտայի բարելավում՝ առնվազն 30 տոկոս ներկայիս 25 տոկոսի փոխարեն
. Բոնուսային համակարգի վերացում Երևանի, Գյումրու և Վանաձորի ավագանիների ընտրությունների ժամանակ
- Ընտրողների ցուցակների կազմման և վարման գործընթացի արդյունավետության բարձրացումն ապահովող մեխանիզմներ.
. Սահմանափակել վավերականության ժամկետը լրացած անձանց անձը հաստատող փաստաթղթերով քվեարկելու իրավունքը՝ ապահովելով վավեր անձնագրերով Հայաստանում գտնվող բոլոր ընտրողների քվեարկելու իրավունքը և ցուցակներում թողնելով առնվազն վերջին մի քանի տարվա ընթացքում անձը հաստատող վավեր փաստաթղթերով ընտրողներին
. Նախատեսվել է մեխանիզմ դատարանի կողմից անգործունակ ճանաչված անձանց ընտրողների ցուցակից հանելու համար
- Ընտրողների իրազեկվածության բարձրացում մասնավորապես՝
. Էապես ավելացվել է հանրային ռադիոյով և հեռուստատեսությամբ անվճար եթերաժամանակը
- Քվեարկության գործընթացի մատչելիության ապահովում, որը ենթադրում է
. Տեղաշարժման դժվարություններ ունեցող ընտրողներին հնարավորություն տալ ժամանակավոր հաշվառվել տեղաշարժման համար մատչելի, գտնվելու վայրին մոտակա տեղամասային կենտրոնում
. Սահմանվել է, որ զինծառայողների անմիջական և ոչ անմիջական պետերին ինչպես նաև կոչումով բարձր սպաներին արգելվում է զինծառայողների քվեարկության ժամանակ քվեարկության սենյակում գտնվել կամ նրանց հետ միաժամանակ նույն պահին նույն քվեարկության սենյակում քվեարկել
- Ընտրական գործընթացների նկատմամբ վերահսկողության հնարավորությունների բարձրացում այդ թվում՝
. Սահմանվել է միջազգային դիտորդական կազմակերպություններին հրավեր ուղարկելու ընթացակարգ
. Ամրագրվել է տեղական դիտորդական կազմակերպությունների կողմից 3-ամսյա ժամկետում իրենց զեկույցները հրապարակման համար ԿԸՀ ներկայացնելու պահանջ
. Սահմանվել է որ ԿԸՀ-ն մերժում է հավատարմագրել այն դիտորդներին, որոնց ղեկավար մարմնի կազմում ընդգրկված անձը ընտրության մասնակցող որևէ կուսակցության ցուցակում է ընդգրկված։