Մոտակա ժամանակներս անպայման հանդիպելու են վարչապետին. Պավլիկ Մանուկյան

Մոտակա ժամանակներս անպայման հանդիպելու են վարչապետին: Այս մասին, այսօր՝ հոկտեմբերի 10-ին, դատարանից ազատ արձակվելուց հետո լրագրողների հետ զրույցում նշեց «Սասնա ծռեր» խմբի անդամ Պավել Մանուկյանը:

«Որովհետեւ «Սասնա ծռերի» անունից ով ասես հանդիպեց, բայց «Սասնա ծռերից» ոչ ոք չի հանդիպել: Մանավանդ վարչապետն առաջիկա օրերին այնտեղ էր»,-ասաց նա:

Պավել Մանուկյանը նշեց, որ առաջինը այցելելու է «Էրեբունի» բժշկական կենտրոն եւ իր շնորհակալությունն է հայտնելու վերակենդանացման բաժանմունքի աշխատողներին. «Երբ աչքս բացեցի եւ տեսա այն հրեշտակներին, որ շրջապատել էին ինձ: Վերակենդանացման բուժանձնակազմի հոգատար վերաբերմունքը, գորովանքն ու գուրգուրանքը, եւ ես համոզվեցի, որ պայքարս ճիշտ ճանապարհին էր եւ եթե 100 կյանք էլ ունենամ, զոհաբերելու տեղ ունեմ»:

Պավել Մանուկյանը նշեց, որ անպայման այցելելու է զոհված ոստիկանների շիրիմներին. «Ճիշտն ասած, ես նրանց էլ եմ համարում զոհ: Անպայման կայցելեմ նրանց շիրիմին»:

Նա նորից պնդեց, որ պատահական կրակոցը, որից մահացել է ոստիկանը, արձակել է Էդվարդ Գրիգորյանը, իսկ Մխիթար Ավետիսյանը բացել է բանկոմատը. «Ինչ ասել եմ՝ բացարձակ ճշմարտություն է: Որպեսզի Էդվարդ Գրիգորյանը դուրս գա եւ ճշմարտությունն ասի: Այսինքն եւ ապստամբել գիտենք, եւ տակից դուրս գալ»,-ասաց նա: