Ես բոլոր խնդիրների հետևից գնացել եմ, դրա համար մարդիկ ուզում են, որ ես լինեմ. Միքայելյանը ԵԿՄ նախագահ դառնալու մասին
ԱԺ «Ելք» խմբակցության պատգամավոր, ՔՊ կուսակցության վարչության նախագահ Սասուն Միքայելյանը դեռևս չի որոշել՝ կընդունի ընկերների առաջարկը ստանձնել ԵԿՄ նախագահի պաշտոնը, թե ոչ։
Լրագրողների հետ ճեպազրույցում, խոսելով ԵԿՄ նախագահի պաշտոնում առաջարկվող մեկ այլ թեկնածու Արամ Սարգսյանի և իր միջև պայքարի մասին, Միքայելյանն ընդգծեց, որ նման խնդիր չկա։
«Ես ոչ մի դեպքում իմ կյանքում պրոբլեմ չունեմ սպարապետի ընտանիքի հետ», - ասաց նա:
Միքայելյանը հիշեցրեց, որ իր թեկնածությունը առաջարկել են իր մարտական ընկերները՝ պնդելով, որ կառույցում կան մի շարք խնդիրներ, որոնք, նրանց պնդմամբ, միայն ինքը կարող է լուծել։
«Իմ մարտական ընկերների առաջ ես պատասխանատու եմ, իրենց հետ քննարկումից հետո կարծիք կհայտնեմ, դուք կիմանաք», - ասաց նա:
Հարցին էլ՝ արդյոք ցանկություն ունի ԵԿՄ նախագահ դառնալ, Միքայելյանն ասաց. «Ցանկության խնդիր չի, գիտեք՝ մեծ պրոբլեմ էր ԵԿՄ-ում: Հիմա մարդիկ ասում են՝ դու կգաս, կլուծես, իմ մարտական ընկերներն են հրավիրել: Ես բոլոր խնդիրների հետևից գնացել եմ, դրա համար մարդիկ ուզում են, որ ես լինեմ: Նորից եմ կրկնում` ես պատասխանատու եմ իմ մարտական գործընկերների առաջ, այդ հարցի պատասխանը կտամ նրանց ու պարզ կլինի», - ասաց նա:
Միքայելյանը նաև նկատեց, որ անկախ նրանից, թե ԵԿՄ նախագահ կնշանակվի ինքը, թե Արամ Սարգսյանը, դա կլինի փոխադարձ համաձայնությամբ։