Գալիս ենք կիլոմետրանոց հերթը կանգնած, ասում են խորհրդակցության է. Բողոքի ակցիա «Նորագավիթ»-ի մաքսատան դիմաց
Ավտովարորդները հոկտեմբերի 1-ին բողոքի ակցիա են իրականացրել ՀՀ պետական եկամուտների կոմիտեի ավտոտրանսպորտային միջոցների մաքսային ձեւակերպումների մասնագիտացված մաքսատան «Նորագավիթ» մասնաճյուղի մոտ։ Նրանք պահանջում են էլեկտրոմենքենաների համար բնապահպանական վճարի վերացում, պաշտոնյաների փոխարինում ավելի բարեխիղճներով, մաքսազերծման գների ու գործընթացի բարեփոխում, ավելորդ թղթաբանության վերացում, ինչպես նաեւ հերթերի կարգավորում։
Հերթերի առումով ցուցարարներից վարորդների իրավունքների պաշտպան Արտակ Խաչատրյանը նշեց, որ ոստիկանությունը եկել, կարգավորել է հերթը։ «Միայն այսօր են եկել ոստիկանությունից։ Ինչո՞ւ մյուս օրերին չէին հիշում»,– նշեց նա՝ շեշտելով, որ ով չի հասցնում մաքսազերծի, մեքենան կանգնեցնում են իրենց մոտ, գումար գանձում դրա համար։
Նա գանգատվեց նաև անբարեխիղճ աշխատակիցներից. «Մաքսայինի պետը նոր աշխատանքի էր ընդունվել և գնացել էր արձակուրդի։ Գալիս ենք կիլոմետրանոց հերթը կանգնած, ասում են խորհրդակցության է, մյուս անգամ գալիս ենք, նորից խորհրդակցության է տեղակալների հետ, ճշտում ենք, պարզվում է՝ այդ մարդկանց ոչ ոք խորհրդակցության չի կանչել»։
Նա նշեց՝ երկակի ստանդարտներ են գործում մաքսազերծման հարցում. «Մարդը բերում է, բոլոր թղթերը ներկայացնում է, ասում են արժանահավատ չի։ Որքան ուզում ես բարեխղճորեն անեն, միեւնույն է՝ ինչ–որ բան գտնում են կասկածելու»։
Նա համաձայնեց, որ Վրաստանից ներկրված մեքենաների պարագայում հասկանալի է՝ շուկան արժանահավատ չէ, սակայն խնդիրներ են առաջանում նաև, ենթադրենք, Գերմանիայից ներկրված մեքենաների պարագայում։
Մաքսայինի պետի տեղակալ Սաֆարյան Արմենը իր հերթին հայտնեց՝ խնդիրները, դժգոհությունները հաշվի են առնվել և կոնկրետ քայլեր են ձեռնարկվում իրավիճակը փոխելու, մաքսազերծման գործընթացի կարգավորման համար։ Նա դժգոհությունները կապեց 2017-ին ներկրվող մեքենաների 85 տոկոս ավելացմամբ այն պարագայում, երբ թողունակությունը նույնն է մնացել։ Պետը բացառեց, որ կամայականություններ են կատարվում մաքսազերծման ժամանակ. «Մենք ունենք կողմնորոշիչ գներ։ Կան պետություններ, որտեղից ներկրվող մեքենաների նկատմամբ invoice-ները հիմք չի ընդունվում, կիրառվում են մեր հսկիչ, կողմնորոշիչ գները, օրինակ՝ Վրաստանից, ԱՄԷ–ից, իսկ, օրինակ, Ճապոնիայից եթե մեքենան ձեռք է բերվել աճուրդից, invoice–ի գները հաշվի են առնվում»։
Նա հավաստիացրեց՝ շուտով ունենալու են միջազգային ստանդարտներին համապատասխանող շենք, որի շնորհիվ կկարգավորվեն հերթերը։