Իլոն Մասկը հեռանում է Tesla-ի տնօրենների խորհրդից

Իլոն Մասկը, ով ավելի վաղ մեղադրվել էր արժեթղթերի եւ բորսաների (SEC) խարդախության մեջ, հսկող մարմնի հետ մինչդատական համաձայնագիր է կնքել, փոխանցում է BBC-ն:
Նա համաձայնվել է 20 մլն դոլարի տուգանք վճարել եւ 3 տարով հեռանալ Tesla-ի տնօրենների խորհրդի նախագահի պաշտոնից, սակայն կպահպանի ընկերության գլխավոր տնօրենի պաշտոնը եւ չի պարտավորվի իրեն մեղավոր ճանաչել:

SEC-ն համարել է, որ Մասկը Tesla-ն ոչ հրապարակային դարձնելու մտադրության մասին իր թվիթներով ներդրողներին դիտավորյալ շփոթության մեջ է դրել, քանի որ այդ մտադրության իրականացման համար ոչ մի բան չի ձեռնարկել:

Օգոստոսի 7-ին Tesla էլեկտրամոբիլներ արտադրող ընկերության ղեկավարը իր թվիթերյան էջում գրել էր, թե մտածում է փոխել ընկերության սեփասկանության ձեւը եւ այն ոչ հրապարակային դարձնել (բորսայում չվաճառվող): Ընդ որում՝ Մասկը նշել էր արժեթղթերի գինը, որով ընկերությունները կարող էին բաժնետերերից գնել բաժնետոմսերը՝ 420 դոլար մեկ բաժնետոմսի համար: Մասկի հայտարարությունից հետո Tesla-ի արժեթղթերը 11 տոկոսով թանկացել էին, սակայն հետո, երբ պարզվել էր, որ գաղափարն անհաջող է, նախկինից ավելի էին էժանացել:

New York Times պարբերականի աղբյուրների տեղեկացմամբ՝ տնօրենների խորհրդի անդամները զայրացել են, քանի որ Մասկը նրանց չէր հայտնել իր մտադրության մասին: Չէր իրազեկվել նաեւ Արժեթղթերի եւ բորսաների հանձնաժողովը, ինչը օրենքի պահանջն է: Այնուհետեւ SEC-ն հետաքննություն էր սկսել:

Մասկին դատի են տվել նաեւ մի քանի բաժնետերեր, որոնցից ոմանք, նրանց խոսքով, բորսայում միլիոնավոր դոլարներ են կորցրել:

Երկու շաբաթ հետո ինովատոր բիզնեսմենը հայտնել է, որ հրաժարվել է Tesla-ն ամբողջությամբ մասնավոր դարձնելու մտքից, քանի որ բաժնետերերն այս գաղափարին հավանություն չեն տալիս:

Սա էլ հենց դարձել է հայցի հիմնավորումը, որն անցյալ չորեքշաբթի կարգավորողը ներկայացրել է Մանհեթենի դաշնային դատարան:

Մասկն իր մեղքը չի ընդունել եւ բազմիցա հայտարարել է, որ ղեկավարվել է միայն ընկերության բարօրությամբ եւ ներդրողների շահերով:

Խարդախության մեղադրանքով դատից խուսափելու եւ հայցը կարգավորելու համար ձեռնարկատիրոջից ու նրա փաստաբաններից 4 օր է պահանջվել:

Կարգավորողի հետ մինչդատական գործարքի համաձայն՝ Մասկն այժմ ընկերության աշխատանքի մասին իր բոլոր թվիթները պետք է համաձայնեցնի փիառ բաժնի հետ:

20 մլն դոլարի տուգանքը դրվել է անձամբ Մասկի վրա, նույնքան էլ պետք է վճարի Tesla ընկերությունը: «Բլումբերգ» գործակալությունը հայտնում է, որ ընկերության վնասը փոխհատուցելու համար Մասկը պատրաստվում է գնել նրա 20 մլն դոլար գումարի բաժնետոմսեր:

Ներկայումս նա տնօրինում է Tesla-ի բաժնետոմսերի 20 տոկոսը՝ համարվելով նրա խոշորագույնհ բաժնետերը: