Վահագն Մուրադյանին աշխատանքից ազատելու որոշումը կապ չունի «Մարտի 1-ի» գործի հետ. Գլխավոր դատախազ
Հայաստանի գլխավոր դատախազ Արթուր Դավթյանը չի կարծում, որ ապօրինի է աշխատանքից ազատել ՀՀ գլխավոր դատախազության հատկապես կարևոր գործերով քննության նկատմամբ հսկողության վարչության նախկին պետ Վահագն Մուրադյանին։ Այս մասին նա հայտնեց ասյօր՝ սեպտեմբերի 27-ին, լրագրողների հետ զրույցում։
Հարցին, թե նման կարեւորության վարչությունը մնացել է առանց պետ, ինչպե՞ս է հիմա իրականցնում իր գործառույթները, Արթուր Դավթյանը նշեց.
«Կարող եք հանգիստ լինել, վարչությունը բնականոն ընթացքով իրականացնում է իր գործառույթները եւ չի կարող չիրականացնել, քանի որ մեխանիզմները, այդ թվում՝ վերահսկողական, այնպիսին են, որ վարչության աշխատանքները ոչ մի դեպքում չեն կարող կազմալուծվել»։
Գլխավոր դատախազը հերքեց նաև, որ նրան ազատելը կապ է ունեցել «Մարտի 1-ի» գործի հետ. «Բացարձակապես, իհարկե ո՛չ»,–եզրափակեց նա։
Գլխավոր դատախազ Արթուր Դավթյանի դեմ դատական հայց է ներկայացրել ՀՀ գլխավոր դատախազության հատկապես կարևոր գործերով քննության նկատմամբ հսկողության վարչության նախկին պետ Վահագն Մուրադյանը:
Նա օգոստոսի 30-ին դիմել է Երեւանի ընդհանուր իրավասության դատարան՝ պահանջելով անվավեր ճանաչել ՀՀ գլխավոր դատախազի՝ 2018թ. որոշումն իրեն պաշտոնից փոխադրելու եւ այլ պաշտոնի նշանակելու մասին հրամանը: