«Ելք» խմբակցության պատգամավորները կառավարությանը ներկայացրել են «Դատական ակտերի հարկադիր կատարման մասին» ՀՀ օրենքում փոփոխություններ անել

ԱԺ «Ելք» խմբակցության պատգամավորներ Հայկ Կոնջորյանն ու Գեւորգ Գորգիսյանը կառավարությանը ներկայացրել են «Դատական ակտերի հարկադիր կատարման մասին» Հայաստանի Հանրապետության օրենքում փոփոխություններ անել: Մասնավորապես, «Դատական ակտերի հարկադիր կատարման մասին» օրենքի 46-րդ հոդվածը լրացնել նոր մասերով, որոնց դրույթների համաձայն՝ պար­տա­պանի մոտ դրամական միջոցների առկայության դեպքում պարտապանի հաշիվները սպա­սարկող բանկը կամ այլ վարկային կազմակերպությունը հնարավորինս սեղմ ժամկետում, բայց ոչ ուշ, քան արգելանք դնելու հաջորդ օրը, էլեկտրոնային հաղորդագրության միջոցով հար­կադիր կատարողին տեղեկացնում է պարտապանի դրամական միջոցների վրա դրված արգե­լան­քի չափի մասին, իսկ հարկադիր կատարողը նշված տեղեկատվությունը ստանալուց հետո էլեկտրոնային հաղորդագրության միջոցով հանում է պարտապանի ունեցած դրամական միջոցների վրա դրված արգելանքը, որն անհրաժեշտ չէ պարտապանի պարտավորության ապահովման համար:

Կառավարությունը, ընդունելի համարելով նախագծով նախատեսված ընդհանուր կարգավորումները, ունի դիտողություն, որը վաղը կառավարության վաղվա նիստում կքննարկվի: Ավելի կոնկրետ՝ արդարադատության նախարարությունն առաջարկում է բանկային հաշվի ընտրության հնարավորությունը պետք է թողնել պարտապանին: Հարկ է նկատի ունե­նալ նաև, որ հնարավոր են դեպքեր, երբ պարտապանը միևնույն բանկում ունի միաժամանակ դրամային և արժութային հաշիվներ կամ ավանդներ: Այս դեպքում նախագծում կարգավորման կարիք ունի նաև հաճախորդի միջոցների նկատմամբ բանկի կողմից արգելադրում իրակա­նաց­նելու հաջորդականությունը: Նախարարությունն առաջարկում է նաև նախագծի 1-ին հոդվածով լրացվող 2.4-րդ մասով նախատեսված արգելանքը մասնակի հանելու դեպքը կարգավորել «Դատական ակտերի հարկադիր կատար­ման մասին» օրենքով նախատեսված արգելանքից հանելու հիմքերով:

Քննարկման կարիք ունի նաև օրենքի ուժի մեջ մտնելու ժամկետը, քանի որ ամ­բողջ ծավալով օրենքի կիրառումը պահանջում է տեխնիկածրագրային փոփոխությունների իրա­կա­նա­ցում:

Հիմք ընդունելով վերոգրյալը՝ Հայաստանի Հանրապետության կառավարությունը պատրաստակամ է համագործակցել օրենքի նախագծի հեղինակների հետ՝ ներկայացված դիտողություններին համապատասխան համապար­փակ լուծումներով օրենքի նախագիծը լրամշակելու նպատակով: