Էդ որ մնացել եմ ՀՀԿ-ում դա հատուկ զոմբիացած վիճակ չի. նախկին ոստիկանապետ
Հասարակության վերաբերմունքը ես կարող եմ գնահատել Երևանի ավագանու ընտրություններով, որտեղ 80 տոկոսը ստացավ «Իմ քայլը» դաշինքը. սա ես համարում եմ ժողովրդի վերաբերմունքը հեղափոխությունից հետո: Այս մասին, սեպտեմբերի 26-ին, ԱԺ-ում լրագրողների հետ զրույցում նշեց ՀՀԿ խմբակցության պատգամավոր, ՀՀ նախկին ոստիկանապետ Ալիկ Սարգսյանը:
Նրա խոսքով, այդ ամենը գնահատելի է, հասկանալի է, պատճառաբանված է. «Դա պարզ է, ու ինչքան էլ փորձեմ մանիպուլյացիաներով դա այլ կերպ ձևակերպել, խոսքերը հետ ու առաջ տանեմ, դրա իմաստը չկա: Բայց այս մթնոլորտը, որ պետք է համատարած հայհոյանք լինի, որ ես ՀՀԿ-ի անդամ եմ, սա կարծում եմ՝ բարոյական չէ և շատ սխալ է»,-ասաց նա:
Ալիկ Սարգսյանն առաջարկեց հիշել 1991 թվականին Լևոն Տեր-Պետրոսյանի ընտրությունը և դրան հաջորդած իրադարձությունները, այդ թվում 1996 թվականի տեղի ունեցածը. «Պետք չի այս ամենով այդքան ոգևորվել ու մարդկանց վիրավորել»:
«Այո, ՀՀԿ-ն վերջին տարիներին, բնականաբար, իր կուրսից շեղվել է, ես դա մի քանի անգամ ասել եմ»,-ասաց նախկին ոստիկանապետը:
Հարցին, թե կարո՞ղ է դուրս գա ՀՀԿ-ից, նա պատասխանեց. «Ինձ մոտ դա այնքան հարաբերական է: Էդ որ մնացել եմ, դա հատուկ էսպես զոմբիացած վիճակ չի, որ մնացել եմ: Ես սպասում եմ՝ տեսնեմ ինչ է լինում, դա էլ հանուն մեր երկրի, հանուն մեր վաղվա օրվա: Սպասում եմ՝ հասկանամ, թե մեր երկիրը որ ուղիով է գնում:
Ես իմ ՀՀԿ շարքերում լինելով որևէ մեկին վնաս չեմ տալիս, որևէ ակցիա չեմ ձեռնարկում: Գրում եք՝ միացել է սրան, միացել է նրան, այդպիսի բան չկա, սուտ է»:
Իսկ ընդհանրապես քաղաքականությունից դուրս գալու մասին էլ ասաց. «Շատ հնարավոր է, ձգտում եմ, սպասում եմ օր շուտ»: