Ադրբեջանը պետք է հրաժարվի ռազմական ցանկացած լուծման գաղափարից և կատարի նախկինում կնքված բոլոր համաձայնությունները. վարչապետ (տեսանյութ)

Բաքուն պետք է փոխի իր անհարգալից վերաբերմունքը բանակցությունների հանդեպ, հրաժարվի հակամարտության ռազմական լուծման գաղափարից եւ կատարի բոլոր նախկին համաձայնությունները: Այս մասին ՄԱԿ-ի Գլխավոր վեհաժողովի 73-րդ նստաշրջանում իր ելույթում նշել է ՀՀ վարչապետ Նիկոլ Փաշինյանը:

Նա նշել է, որ մեծ պատիվ է 73-րդ նստաշրջանի ամբիոնից հանդես գալը որպես մի երկրի վարչապետ, որտեղ տեղի է ունեցել ժողովրդի հեղափոխություն:

«ԼՂ հակամարտության խաղաղ կարգավորումը շարունակում է մնալ մեր արտաքին քաղաքական օրակարգի առաջնահերթ հարցը: Արցախի կարգավիճակն ու անվտանգությունը Հայաստանի համար բացարձակ առաջնահերթություն են բանակցությունների գործընթացում: Ռազմական միջոցներով հակամարտության կարգավորման ցանկացած փորձ անմիջական վտանգ է ներկայացնում տարածաշրջանային անվտանգության, ժողովրդավարության ու մարդու իրավունքների համար»,- ասել է ՀՀ վարչապետը:

Փաշինյանը հավելել է, որ Հայաստանը շարունակելու է իր կառուցողական ներգրավվածությունը հակամարտության խաղաղ կարգավորման գործընթացում՝ ԵԱՀԿ Մինսկի խմբի համանախագահների ձեւաչափով: Նա ընդգծել է, որ «սա միջազգային մակարդակով միակ օրգանն է, որն ունի մանդատ այս հակամարտության կարգավորման համար»:

Անդրադառնալով ադրբեջանական կողմի դիրքորոշմանը՝ ՀՀ վարչապետն ասել է, որ Ադրբեջանը պետք է փոխի իր անհարգալից վերաբերմունքը բանակցությունների հանդեպ: «Նա պետք է հրաժարվի ռազմական ցանկացած լուծման գաղափարից եւ կատարի նախկինում կնքված բոլոր համաձայնությունները: Ավելին՝ եթե Ադրբեջանն իսկապես հավատարիմ է խաղաղաշինության գործընթացին, ապա պետք է բանակցություններ սկսի այս հակամարտության հիմնական կողմի՝ Լեռնային Ղարաբաղի հետ: Ադրբեջանն ամեն առիթով նշում է, որ Ղարաբաղը պետք է իր տարածքի մասը կազմի, սակայն միեւնույն ժամանակ նաեւ հայտարարում է, որ բանակցություններ չի վարելու Լեռնային Ղարաբաղի հետ: Հարցը հետեւյալն է. ինչպես կարող է Ադրբեջանը պահանջներ ներկայացնել Լեռնային Ղարաբաղի վերաբերյալ եւ միեւնույն ժամանակ չխոսել նրա հետ»:

Փաշինյանի խոսքով, նման բան հնարավոր է միայն այն դեպքում, «եթե Ադրբեջանի ղեկավարությունը ցանկանում է ստանալ տարածը, բայց ոչ ժողովրդին»: «Այսպիսով՝ ակնհայտ է դառնում, որ Ադրբեջանի ղեկավարությունը մտադիր է Լեռնային Ղարաբաղը «մաքրել» հայերից, ինչպես արվել է Նախիջեւանում: Հետեւաբար, Լեռնային Ղարաբաղը կարող է գալ այն եզրահանգման, որ Ադրբեջանի մասը կազմելն իր համար կնշանակի լիովին ոչնչացված լինել: Ուստի՝ հայ ժողովրդի նոր ցեղասպանությունը կանխելու համար Լեռնային Ղարաբաղը չպետք է Ադրբեջանի մասը կազմի»,- հայտարարել է Նիկոլ Փաշինյանը՝ հավելելով, որ հակամարտությունը կարող է եւ պետք է կարգավորվի միայն բոլոր կողմերի փոխադարձ փոխզիջումների միջոցով՝ մի մթնոլորտում, որը բարենպաստ կլինի խաղաղության համար, այլ ոչ թե պատերազմի: