Ընտրողների մասնակցության թիվը խոսում է բարձր ակտիվության մասին. Տիգրան Մուկուչյան
Կենտրոնական ընտրական հանձնաժողովի նախագահ Տիգրան Մուկուչյանն այսօր լրագրողների հետ զրույցում պատասխանելով հարցին՝ թե իր կարծիքով վստահություն իրենց կառույցի նկատմամբ հանրության մոտ առաջացե՞լ է, և ինչպիսի՞ ընտրություններ են օրինականության, թափանցիկության առումով՝ ի տարբերություն նախորդ ընտրությունների, նա ասաց, որ լիարժեք ծավալով ապահովել են բոլոր ընտրական գործընթացների նկատմամբ առավելագույն թափանցիկություն:
«Տրվել են կատարված աշխատանքի բոլոր գնահատականները, դրանք դրական են եղել»,-ասաց նա:
Ինչ վերաբերում է մանդատների բաշխմանը, Մուկուչյանը ներկայացրեց ընտրական օրենսգրքի պահանջները և շեշտեց, որ ընտրությունների վերջնական արդյունքի հիման վրա է կատարվում բաշխումը:
Այսպիսով, ըստ Ընտրական օրենսգրքի՝ Երևանի ավագանու անդամների 65 մանդատները բաշխվում են այն կուսակցությունների և կուսակցությունների դաշինքների թեկնածուների ընտրական ցուցակների միջև, որոնք ստացել են ընտրություններում կողմ քվեարկված քվեաթերթիկների ընդհանուր թվի և անճշտությունների թվի գումարի համապատասխանաբար առնվազն, կուսակցությունների դեպքում՝ 6 տոկոս, իսկ կուսակցությունների դաշինքների դեպքում՝ 8 տոկոս կողմ քվեարկված քվեաթերթիկներ:
Տիգրան Մուկուչյանը նշեց, որ եթե կողմ քվեաթերթիկների քանակը չեն հաղթահարել 3-ից պակաս կուսակալություններ և կուսակցությունների դաշինքներ, ապա մանդատների բաշխումը տեղի է ունենում առավելագույն կողմ ստացած 3 կուսակցությունների և կուսակցությունների դաշինքների միջև։
Ինչ վերաբերում է նրան, թե որ ուժին, որքան մանդատ է բաժին ընկնում, նա ասաց, որ այս փուլում ձեռնպահ կմնա որոշակի հաշվարկներ ներկայացնելուց: «Յոթերորդ օրը կիրականացվի արդյունքների վերջնական ամփոփում, կտրվեն մանդատները, և դրանից հետո արդեն ՏԻՄ օրենքի կանոնակարգը կգործի»,-ասաց նա:
Տիգրան Մուկուչյանն ասաց, որ ընտրողների մասնակցության թիվը խոսում է բարձր ակտիվության մասին, և եթե առավոտյան ավելի քիչ էին այցելում տեղամասեր, ապա կեսօրից բավական բարձրացավ ընտրողների այցելությունը, ինչն արտացոլվեց ցուցանիշներում: