Ջանք չենք խնաելու Ինտերպոլի հետ համագործակցոթյունն ընդլայնելու ուղղությամբ. Օսիպյանը՝ Ինտերպոլի պատվիրակությանը
Սեպտեմբերի 20-ին Հայաստանի Հանրապետության ոստիկանության պետ Վալերիյ Օսիպյանն ընդունել է միջազգային ոստիկանական կազմակերպության՝ Ինտերպոլի Եվրոպայի տարածաշրջանի հարցեով ստորաբաժանման տնօրեն Մաթեուշ Վոլչակի գլխավորած պատվիրակությանը։
Այս մասին հայտնում են ՀՀ ոստիկանությունից:
Ողջունելով հյուրերին՝ Վալերիյ Օսիպյանը բարձր է գնահատել միջազգային ոստիկանական համագործակցության ոլորտում Հայաստանի ոստիկանության Ինտերպոլի ազգային կենտրոնական բյուրոյի դերն ու նշանակությունը։ Ոստիկանության պետը փաստել է, որ համագործակցության արդյունավետության լավագույն օրինակ է հետախուզվող անձանց հայտնաբերումը։ Միայն այս տարվա ութ ամիսների ընթացքում Ինտերպոլի անդամ տարբեր երկրներում հայտնաբերվել է Հայաստանի ոստիկանության կողմից միջազգային մակարդակով հետախուզվող 114 անձ։
Նույն ժամանակահատվածում Հայաստանում հայտնաբերվել է Ինտերպոլի անդամ տարբեր երկրների իրավապահների կողմից միջազգային մակարդակով հետախուզվող 42 անձ։ Հայաստանի ոստիկանության Ինտերպոլի ազգային կենտրոնական բյուրոն այս տարի դարձավ Ինտերպոլի եվրոպական կոմիտեի անդամ, ինչը Վալերիյ Օսիպյանի հավաստմամբ՝ հանցավորության դեմ միջազգային պայքարում Հայաստանի ոստիկանության ներդրման արդյունք է։ «Հանցագործությունը ազգություն չունի և անդրազգային հանցավորության դեմ պայքարում Հայաստանի ոստիկանությունը ջանք չի խնայելու Ինտերպոլի հետ համագործակցային դաշտն ընդլայնելու, նոր ձեռքբերումներ արձանագրելու ուղղությամբ»,- հավելել է ոստիկանության պետը։
Մաթեուշ Վոլչակն իր և պատվիրակության անունից շնորհակալություն է հայտնել տպավորիչ ընդունելության համար՝ ուրախությամբ փաստելով, որ Հայաստանի ոստիկանության Ինտերպոլի ազգային կենտրոնական բյուրոն իր ուրույն տեղն ունի միջազգային ոստիկանական ընտանիքում։ Պատվիրակը կարևորել է նաև Ինտերպոլի գլխավոր քարտուղարության և անդամ երկրների ազգային կենտրոնական բյուրոների հետ Հայաստանի ոստիկանության արդյունավետ համագործակցությունը հատկապես կիբերհանցավորության, կազմակերպված հանցավորության, ահաբեկչության դեմ պայքարի ոլորտներում։
«Աշխատանքային այցի ընթացքում համոզվեցի, որ Հայաստանում նպաստավոր պայմաններ են ստեղծվել փոխգործակցության ամրապնդման համար»,-նշել է Մաթեուշ Վոլչակը։ Քննարկվել են իրականացվելիք ծրագրերին և միջոցառումներին Հայաստանի ոստիկանության մասնակցության հետ կապված հարցեր։ Առանձնահատուկ խոսվել է ծրագրային համակարգերի ներդրման անհրաժեշտության մասին, որոնք իրավապահներին հնարավորություն կտան հայտնաբերելու նաև հետախուզվող մեքենաներ ու կորած փաստաթղթեր։ Հանդիպմանը քննարկվել են նաև փոխադարձ հետաքրքրություն ներկայացնող ծրագրերը հնարավորինս արագ կյանքի կոչելու վերաբերյալ հարցեր։