Մի ուժ կա, որի տեսակետի փոփոխությունից կարող է իրավիճակը փոխվել, և դա ժողովուրդն է. Նիկոլ Փաշինյան
Մենք ուրախ ենք, որ մեր սև-սպիտակի բանաձևով բոլոր քաղաքական ուժերին ստիպեցինք ուղիղ և անկեղծորեն խոսել ժողովրդի հետ: Այս մասին այսօր «Իմ քայլը» դաշինքի` Մալաթիա-Սեբաստիա համայնքում ընթացող քարոզարշավին հայտարարեց ՀՀ վարչապետ Նիկոլ Փաշինյանը:
«Սև-սպիտակի հարցում էլ ուզում եմ լինել կատարյալ անկեղծ: Իրականում ինչի՞ց է ծագել այդ ամբողջ բարդությունը: Դա ծագել է հետևյալից, որ «Իմ քայլը» դաշինքը ձևավորվել է որպես հեղափոխության ներկայացուցիչների դաշինք: Եվ ընտրարշավի ընթացքում այնպես է ստացվել, որ շատերը հանդես էին գալիս որպես մի ուժ, որը դեռ էն գլխից հեղափոխության կողքին է եղել, ընդհուպ հեղափոխություն է արել:
Երբ մենք տեսանք, որ այս մարդիկ բեմերից հեղափոխության անունն են տալիս, հետո գնում են՝ բակերում Հանրապետական ընտրակեղծարարների հետ բանակցելու, մենք ասացինք, որ այսպես այլևս շարունակել չի կարելի:
Եթե սև-սպիտակից որևէ մեկը դժգոհում է, առաջին հերթին մենք ենք դժգոհում, որովհետև դուք եք ձեր քայլերով ձեզ դրել մի դաշտում, երբ ուզում էիք վերակենդանացնել մեր ռեալ քաղաքական համակարգը»,- նշեց վարչապետը:
Նրա համոզմամբ՝ ռեալ քաղաքական համակարգը՝ ընտրակեղծիքների միջոցով իշխանության գալը, վերակենդանացնելու փորձերը ձախողված են:
«Մենք ուրախ ենք, որ մեր սև-սպիտակի բանաձևով բոլոր քաղաքական ուժերին ստիպեցինք ուղիղ և անկեղծորեն խոսել ժողովրդի հետ: Իրենք հասկացան, որ պետք է խոսեն ոչ թե հանրապետականների, այլ ժողովրդի հետ»,- ասաց Ն. Փաշինյանը:
Նիկոլ Փաշինյանն ընդունում է, որ շատ դեպքերում Երևանի քաղաքապետի թեկնածուների հասցեին սոցցանցերում լինում են հայհոյախոսություններ, բայց դա լինում է նաև իր հետ:
«Օրինակ՝ իմ ուղիղ եթերների տակ մեկնաբանություններում էլ հայհոյախոսություններ կան: Համաձայն եմ, որ պետք է ավելի հանդուրժող միջավայր ձևակերպել, իրար քննադատությանն ավելի ուշադիր լինել: Մարդիկ, երբ բողոքում են խոսքի ազատության պակասից, պետք է նախ մտածեն՝ ինչ են ասում: Որովհետև ՀՀ-ում մարդ կա՝ մի շաբաթում 3 հեռուստաընկերություն է առնում, ասում է՝ իմ խոսքը, ազատության իրավունքները ոտնահարվում են»,- ասաց նա:
Վարչապետի վստահեցմամբ՝ եթե 10 օր առաջ կարելի էր խոսել հակահեղափոխության մասին, ապա այսօր հստակ է, որ ՀՀ քաղաքացիների իշխանությանը ոչինչ չի սպառնում և չի սպառնալու:
Ըստ նրա՝ հիմա էլ քաղաքական ուժերն ասում են, որ ժողովրդավարություն է հաստատվում, հեղափոխություն է եղել, սակայն պետք է պայմանավորվել. «Մենք ասում ենք՝ ոչ մեկի հետ չենք պայմանավորվելու, քանի որ բոլոր պայմանավորվածությունները ժողովրդի հետ են»:
Ինչ վերաբերում է ՀՀԿ-ին, ապա Փաշինյանն ասաց. «Մի հատ ձեզ թափ տվեք»: Նա հավելեց, որ ՀՀԿ-ից բացի խորհրդարանական այլ ուժեր ևս դեմ են, որ խորհրդարանական արտահերթ ընտրություններ լինեն: «Ես չեմ հասկանում՝ սա ինչ մտածողության ձև է, այսինքն՝ չե՞ն հասկացել, թե Հայաստանում ինչ է կատարվել: Ինձ ասում են՝ այ մտածեք, որ այն ուժերը, որ օգնել են ձեզ, այլևս չեն օգնելու: Այնպիսի մի ուժ կա, որի տեսակետի փոփոխությունից կարող է իրավիճակը փոխվել, դա ժողովուրդն է: Սա ոչ թե արհամարհանք է ու սպառնալիք, սա պարզ քաղաքականության իրողության արձանագրում է: Այդ մարդիկ ասում են՝ իրենք հեղափոխություն ենք արել, բայց մինչև հիմա գլխի չեն ընկել, թե որն էր այդ հեղափոխության առանցքային իմաստը»,-հայտարարեց Ն. Փաշինյանը: