Դատախազությունը Երևանում ձերբակալված հակահայ թուրք լոբբիստ Օքսուզին հանձնելու վերաբերյալ միջնորդություն է ստացել
Գլխավոր դատախազությունն ԱՄՆ իրավասու մարմիններից միջնորդություն է ստացել Երևանում ձերբակալված ազգությամբ թուրք հակահայ լոբբիստ Քևին Օքսուզին արտահանձնելու վերաբերյալ:
ԱՄՆ իրավապահների կողմից հետախուզվող Քևին Օքսուզը, հիշեցնենք, հայտնաբերվել է օգոստոսի 29-ին Երևանում։ Նա մեղադրվում է փաստացի նյութերը կեղծելու միջոցով թաքցնելու եւ ԱՄՆ Ներկայացուցիչների պալատի էթիկայի հանձնաժողով կեղծ հայտարարագիր ներկայացնելու (4 դրվագ) մեջ:
Քևին Օքսուզը շուրջ մեկ տարի Հայաստանում զբաղվել է ձեռնարկատիրական գործունեությամբ։ Նրա կողմից հիմնադրված «ԴԸ ՍԵՆԱ ԳՐՈՒՊ» ընկերությունը զբաղվում է հավաքների, հանդիպումների եւ այլ միջոցառումների կազմակերպմամբ։
ՀՀ գլխավոր դատախազությունից հայտնում են, որ Օքսուզի հիմնած «ԴԸ ՍԵՆԱ ԳՐՈՒՊ» ընկերությունը խուսափել է խոշոր չափերով հարկերի վճարումից: Հիշյալ դեպքի առիթով ՀՀ ոստիկանության կազմակերպված հանցավորության դեմ պայքարի գլխավոր վարչության կողմից ՀՀ քրեական օրենսգրքի 205-րդ հոդվածի 1-ին մասի հատկանիշներով հարուցվել է քրեական գործ։
Հիշեցնենք, որ Երևանի ընդհանուր իրավասության առաջին ատյանի դատարանի՝ օգոստոսի 31-ի որոշմամբ Օքսուզը մեկ ամսով կալանավորվել է։