Ես երբեք չէի կարող մտածել, որ Ուկրաինայի և Ռուսաստանի միջև պատերազմ կարող է լինել. Քոչարյան

Ես երբեք չէի կարող մտածել, որ Ուկրաինայի եւ Ռուսաստանի միջեւ պատերազմ կարող է լինել։ Այս մասին «Կոմերսանտի» հետ հարցազրույցում հայտարարել է ՀՀ 2-րդ նախագահ Ռոբերտ Քոչարյանը՝ պատասխանելով հարցին, թե կարող էր արդյոք պատկերացնել, որ Ուկրաինայում եւ Ղրիմի հարցում տեղի կունենար այն, ինչ եղավ։

«Կանխատեսե՞լ։ Ես երբեք չէի կարող մտածել, որ պատերազմ կարող է լինել Ուկրաինայի եւ Ռուսաստանի միջեւ։ Դժվար կլիներ պատկերացնել, որ դա հնարավոր է»,–նշել է նա։ Հարցին, թե ինչպիսին է նրա վերաբերմունքը Ղրիմի նկատմամբ, Քոչարյանը նշել է, որ, այնուամենայնիվ, «Ղրիմն առանձին պատմություն է»։

Նրա խոսքով՝ ռուսները համոզված են, որ Ղրիմը ռուսական է. «Եվ պատմականորեն այն, անկասկած, ռուսական է։ Իմ վերաբերմունքը որպես ղարաբաղցու եւ Ղարաբաղի առաջին նախագահի, այն է, որ պետք է առաջին հերթին տեսնել, թե ինչ են մտածում մարդիկ, որոնք ապրում են այդ հողում։ Խոսքն ինչի՞ մասին է։ Ինչ–որ քառակուսի կիլոմետր հողի մասի՞ն է, թե՞, այնուամենայնիվ, մարդկանց, որոնք ապրում են այդ հողում»։

Նկատառմանը, որ ավելի հաճախ խոսվում է քառակուսի կիլոմետրի մասին, քան մարդկանց, նախկին նախագահը նկատել է, որ, ցավոք, այդպես է. «Անհնար է մարդուն պոկել հողից, որի վրա ապրում է։ Վստահ եմ, որ դա ոչ միայն կիլոմետր է, այլ նաեւ մարդիկ։ Այս պատճառով կա հանրաքվեի գործընթաց, կա ինքնորոշում հասկացություն։

Եթե կա հարգանք ազգի ինքնորոշման նկատմամբ, ապա այդ գործընթացով իրականացվող ամեն ինչ, ինչպես սկզբունքորեն նորագույն պատմության մեջ մի շարք երկրներում տեղի է ունեցել, կլիներ ճիշտ բաժանություն այն պարագայում, երբ համատեղ կյանքը սպառնալիքի տակ է դնում մարդկանց կյանքն ու անվտանգությունը։ Պատասխանելով հարցին՝ Ղրիմի դեպքում բաժանությունը ճիշտ կլիներ, Քոչարյանը հայտարարել է, որ այն ըստ էության տեղի է ունեցել արդեն։

«Ես Ղրիմում մի քանի անգամ եղել եմ։ Ոչ վերջին ժամանակներս։ Ի դեպ, վերջին իրադարձություններից հետո Ղրիմում չեմ եղել…Ես ամռանը հանգստանում եմ Հունաստանում։ Սակայն մինչեւ այդ, լինելով Ղրիմում, իմ մոտ կա հստակ ընկալում, որ բնակչության մեծ մասը կողմնորոշված է դեպի ՌԴ, սա ակնհայտ է։ Հնարավոր է, դա (Ղրիմի միացումը) կարող էր փոքր–ինչ այլ կերպ լիներ, այլ ուղով, որը չբերեր հետագա արյունահեղության Դոնեցկում ու Լուգանսկում։

Հարցին, թե կիսվել է արդյոք այդ նկատառումնորով Պուտինի հետ, Քոչարյանն ասել է. «Էթիկայի տեսակետից դա սխալ է»։