Փոխվարչապետ Տիգրան Ավինյանի առաջին աշխատանքային այցը Շիրակի մարզ
Այսօր Շիրակի մարզ է այցելել ՀՀ փոխվարչապետ Տիգրան Ավինյանը: Սա առաջին աշխատանքային այցն է, ինչպես փոխվարչապետը բնորոշեց, ամենաշատ խնդիրներն ունեցող մարզ: Շիրակի մարզպետարանում անցկացվել է խորհրդակցություն մարզպետարանի վարչության պետերի, մարզի ուժային կառույցների ղեկավարների և համայնքապետերի հետ:
Փոխվարչապետը խոսել է Շիրակի մարզում 1 շնչին բաժին ընկնող համախառն ներքին արդյունքից, որը հանրապետական միջին ցուցանիշի 52 տոկոսն է կազմում: Մարզում առաջնահերթ լուծման ենթակա խնդիրներից փոխվարչապետ Ավինյանն առանձնացրել է գյուղատնտեսության արդյունավետության բարձրացումը, ճանապարհների վերանորոգումը, ջրամատակարարման համակարգի վիճակը: Քննարկվել է նաև պետական սուբվենցիոն ծրագրում կարգի փոփոխության անհրաժեշտությունը:
Մարզի 42 համայնքից միայն 11-ն է օգտվել պետական հատկացումներից, քանի որ պահանջվող նվազագույն 5 մլն դրամ համայնքային ներդրումն ապահովել չեն կարողացել: Փոխվարչապետը խոսել է նաև Գյումրիի փողոցաշինական մեծ ծրագրում եղած նախագծային թերություններից, օդանավակայանում կատարվող շինարարական աշխատանքներից և նոր աշխատատեղեր խոստացող լոգիստիկ կենտրոնի կառուցումից, որում ներդրումներ են կատարելու իսրայելցի գործարարները:
Գյումրիի քաղաքապետ Սամվել Բալասանյանը փոխվարչապետին տեղեկացրել է, որ Գյումրիում 343 հա հող վարձակալությամբ է տրամադրվել լոգիստիկ կենտրոն կառուցելու նպատակով, բայց 3 մլրդ դրամի ներդրում խոստացող ծրագիրը չի մեկնարկում, քանի որ անհրաժեշտ է բավարարել տարածքում ազատ տնտեսական գոտի հիմնելու ներդրողների պահանջը։ Փոխվարչապետ Տիգրան Ավինյանը նշել է, որ ծրագրի փաթեթն արդեն քննարկվել է ԱԺ-ում, բացի իսրայելական ընկերությունից, այլ կազմակերպություններ ևս կան, որոնք հետաքրքրված են այս ծրագրով։ Ընտրությունը հավանաբար կկատարվի մրցութային կարգով։