Այդ զանգը լուրջ աջակցություն է․ Քոչարյանը՝ Պուտինի շնորհավորանքի մասին

«Այդ զանգը լուրջ աջակցություն է։ Բայց ես երբեք այդպիսի հարաբերությունները չեմ հրապարակել»,- ռուսական «Коммерсант» պարբերականին տված հարցազրույցում ասել է ՀՀ երկրորդ նախագահ Ռոբերտ Քոչարյանը՝ անդրադառնալով Ռուսաստանի նախագահ Վլադիմիր Պուտինի շնորհավորական հեռախոսազանգին, որի մասին հաղորդագրությունը տեղադրվել էր ՌԴ նախագահի կայքում։

Քոչարյանը պատմել է նաև իրենց ընկերական հարաբերությունների մասին։ Լրագրողի այն հարցին, թե պատրաստվո՞ւմ է հոկտեմբերին Պուտինի ծննդյան առթիվ զանգել նրան, Քոչարյանը պատասխանել է, որ չի կարող զանգել, որովհետև կապը գաղտնագրված չէ։ Քոչարյանը բացատրել է, որ հաճախ է գնում Մոսկվա, և կարող էր անձամբ տեսնել ու շնորհավորել, սակայն Հայաստանի իշխանությունները թույլ չեն տալիս դուրս գալ երկրից։

«Սա ակնհայտ խնդիր է, որովհետև ես ազատվել եմ իմունիտետի հիման վրա (նախագահի անձեռնմխելիություն) դատարանի որոշմամբ, բայց, այդուհանդերձ, ինձ չեն վերադարձնում անձնագիրս ու ասում են, որ ես չեմ կարող հեռանալ։ Բացարձակ ապօրինի։ Իշխանությունը, որ մշտապես խոսում է երկրում օրինականության վերականգնման մասին, իրեն պահում է ծայրահեղ հակառակ կերպ»,- նշել է Քոչարյանը։