Կնախընտրեի, որ ինձ դիմեին «պարոն նախագահ», ոչ թե «պարոն վարչապետ»․ Քոչարյան
Երկրորդ նախագահը իշխանական որևէ բարձունքի չի ձգտում, քանի որ ժամանակին եղել է և՛ Արցախի, և՛ Հայաստանի նախագահ, անցել է կարիերայի բոլոր աստիճաններով։ Այս մասին հայտարարել է ինքը՝ Քոչարյանը, ռուսական «Коммерсант» պարբերականին տված հարցազրույցում։ Քոչարյանի խոսքով՝ ինքը կնախընտրեր, որ իրեն դիմեին «պարոն նախագահ», ոչ թե «պարոն վարչապետ», քանի որ, ըստ նրա, առաջինն ավելի լավ է հնչում։
«Բայց հարցը որևէ կոնկրետ պաշտոն զբաղեցնելու ձգտումը չէ, այլ հստակ ընկալումը, որ հիմա կատարվողն ուղղակի անընդունելի է պետության համար։ Դա լրիվ ուրիշ կերպ է մոտիվացնում քեզ։ Լինել հեռու և լինել անտարբեր այն ամենին, ինչ կատարվում է հիմա՝ ես դա ինձ չէի ների», – նշել է ՀՀ երկրորդ նախագահը։
Հարցին՝ ինքն իրեն տեսնում է առաջնորդի՞, թե՞ ուրիշներին առաջ տանողի դերում, Քոչարյանը պատասխանել է, որ երկու տարբերակներն էլ հնարավոր են։ Երկրորդ նախագահը նշել է, որ արդեն ինչ-որ արդյունքների հասել է՝ հանրությանը ցույց տալով, որ պետք չէ վախենալ սեփական կարծիքն արտահայտելուց։