Տավուշում հիմնվելու է նմանը չունեցող անասնապահական ֆերմա, նաև տեքստիլ արտադրություն. Սուրեն Պապիկյան
Վարչապետի հրամանով Տարածքային կառավարման և զարգացման նախարարությունում ձևավորված աշխատանքային խումբը բնակիչների կողմից մայիս-սեպտեմբեր ամիսներին ստացել է 1500 դիմում, որոնց 30 տոկոսը լուծվել է:
Այս մասին լրագրողների հետ զրույցում ասաց նախարար Սուրեն Պապիկյանը:
Հարցերը եղել են թե՛ մեր գերատեսչությանը, թե՛ այլ գերատեսչություններին վերաբերող: Որոնք մեր գերատեսչությանը չեն վերաբերել, հասցեագրվել են համապատասխան մարմիններ»,- շեշտեց նա:
Նախարարն ընդգծեց, որ այս ամիսների ընթացքում այցեր է ունեցել տարբեր մարզեր, դիտակետում են եղել խոշորացման հետ կապված հարցերը: Սուրեն Պապիկյանը շեշտեց, որ պաշտոնական այց է ունեցել նաև ՌԴ, մասնակցել է գործարար համաժողովի: Նա տեղեկացրեց, որ նոյեմբերի 6-8 մասնակցելու է Եվրոպայի խորհրդի տեղական և տարածքային իշխանությունների կոնգրեսի 35-րդ նստաշրջանին:
Նախարարը կարևորեց աղբահանության հետ կապված աշխատանքները, հիշեցրեց, որ աղբահանություն կատարող օպերատորը երկու անգամ տուգանվել է, հասել են նրան, որ լրացուցիչ 5 աղբատար մեքենաներ բերվեն:
«Մեքենաները Հայաստան -Վրաստան սահմանը հատում են այս պահին, հավանաբար վաղը կլինեն Հայաստանում, և քաղաքի աղբահանման խնդիրներն ավելի պատշաճ կկատարվեն, բայց վստահություն չկա ընկերության նկատմամբ , քանի որ պայմանագրի կետեր են խախտվել»,- շեշտեց նա:
Սուրեն Պապիկյանն ասաց, որ Ֆրանկոֆոնիային ընդառաջ պայմանավորվել են նաև տեխնիկա ներգրավել այլ համայնքներից, որպեսզի խնդիրներ չառաջանան:
Սուրեն Պապիկյանը կարևորեց նաև Տավուշում անցկացված գործարար համաժողովը, որին մասնակցել է 100 գործարար, այդ թվում՝ արտասահմանից:
«Հիմնվելու է մարզում նմանը չունեցող անասնապահական ֆերմա, նաև տեքստիլ արտադրություն: Մովսես գյուղի բնակիչներ, ովքեր ապրում են ՌԴ-ում, խոստացել են 200 հազար դոլար ներդրում կատարել՝ դեպի Մովսես տանող ճանապարհահատվածի նորոգման համար: Կառավարությունը չի կարող համաֆինանսավորել այս տարի, բայց ամեն ինչ կանենք՝ ծրագիրը կյանքի կոչելու համար»,- շեշտեց նա: