Ահազանգ է ստացվել, որ համայնքներից մեկում քաղաքական ուժի կողմից ընտրակաշառք են բաժանում. Լենա Նազարյան
«Ելք» խմբակցության ղեկավար Լենա Նազարյանից ԱԺ ճեպազրույցների ժամին լրագրողները հետաքրքրվեցին, թե ինչու իրենց թեկնածու Հայկ Մարությանը չի գնում բանավիճելու Նաիրա Զոհրաբյանի հետ, արդյոք նա վախենո՞ւմ է միայնակ բանավիճելուց: Լենա Նազարյանը պատասխանեց, որ հարցը պետք է Հայկ Մարությանին ուղղել:
«Չեմ կարծում՝ մեր թեկնածուն խուսափում է, գիտեք, որ այս օրերին ինքը վարչական շրջաններում ընտրողների հետ հանդիպումներ է անցկացնում և, հավանաբար, ինքն այդ շփումը ավելի է կարևորում»,-ասաց նա:
Դիտակմանը, թե նման պատասխան նաև ՀՀԿ-ից Տարոն Մարգարյանն էր տալիս, Լենա Նազարյանը նշեց՝ չի հիշում, որ Տարոն Մարգարյանը քայլում էր փողոցներով և բուկլետներ բաժանում:
«Այդուհանդերձ, ես կարծում եմ, որ լավ կլինի՝ թեկնածուները մասնակցեն բանավեճին»,-ասաց նա:
Լրագրողները հետաքրքրվեցին, թե ինչպես է վերաբերում Ալեքսանդր Սարգսյանի հայտարարությանը, որ չի պատրաստվում գումարները վերադարձնել և դրանք անօրինական են կալանքի տակ պահվում, Լենա Նազարյանը նշեց, որ ապօրինի հաստացման հարցով պետք է զբաղվեն իրավապահ մարմինները, և կառավարության անդամները պետք է հետամուտ լինեն այդ հարցին:
Ի դեպ, Լենա Նազարյանը նշեց, որ այսօր առավոտյան ահազանգ են ստացել այն մասին, որ համայնքներից մեկում քաղաքական ուժի կողմից ընտրակաշառք են բաժանում: Նա, սակայն, չմեկնաբանեց, թե կոնկրետ որ քաղաքական ուժի մասին է խոսքը:
«Իրավապահներին դիմել ենք և, ըստ էության՝ վարչապետի կողմից կոշտ արտահայտությունները ուղղված են այն անձանց, ովքեր օրինակությանը և հեղափոխության արժեքներին դեմ են: Մենք խոստացել ենք, որ կլինեն ազատ և արդար ընտրություններ»,-ասաց նա: