Ամբողջ հայ ժողովրդի կողմից ասում եմ՝ չեք կարող խլել հաղթանակը, թույլ չենք տա. Մարության
Նորք-Մարաշ վարչական շրջանում Երևան քաղաքի ավագանու ընտրություններին մասնակցող «Իմ քայլ»-ը դաշինքի քարոզարշավի ժամանակ ցուցակը գլխավորող Հայկ Մարությանը հայտարարեց, թե այսօր Նորք-Մարաշում տեսել է հրաշք մարդկանց, որոնք ՀՀ ապագան են, կառուցող մարդիկ են։
«Հարգելիներս, մենք այսօր ապրում ենք շատ պատմական շրջանում, քանի որ ընդամենը մի քանի օր անց ներկա ենք լինելու ազատ, արդար ու թափանցիկ ընտրությունների։ Դա հնարավոր դարձավ միայն ձեր շնորհիվ, հնարավոր դարձավ այն հեղափոխության շնորհիվ, որն արել է ամբողջ հայ ժողովուրդը։ Այսօր կան մարդիկ, որոնք մտածում են, թե կարող են մեր ժողովրդից խլել այս հաղթանակը։ Ձեր կողմից, մեր թիմի կողմից, ամբողջ հայ ժողովրդի կողմից ասում եմ՝ չեք կարող, թույլ չենք տա։ Այո, այս հարցում մենք միասնական ենք, այս հաղթանակը մեր երեխաներինն ու ամբողջ հայությանն է»,- ասաց նա։
Մարությանը նշեց, որ որպես հեղափոխության տրամաբանական շարունակություն է ստեղծվել « Իմ քայլը» դաշինքը, որը գնում է առաջ՝ ներկայացնելով իր թեկնածուներին։
««Իմ քայլը» դաշինքի ավագանու թեկնածուների մեջ մարդիկ են, որոնք տասնամյակներ շարունակ ձեզ հետ միասին պայքարել են, նրանք նաև պրոֆեսիոնալներ են, որոնք բոլորն ապրում են ու ապրելու են Երևանի հոգսերով ու ապագայով»,- շարունակեց Մարությանը։
«Իմ քայլը» դաշինքի ցուցակը գլխավորողը նշեց, որ Երևանի զարգացման իրենց ծրագիրը բաղկացած է 50 կետից, սակայն այսօր մի քանիսի մասին կխոսի։ Հայկ Մարությանի խոսքով՝ ծրագրի ամենակարևոր կետն ուղիղ ժողովրդավարությունն է, այսինքն՝ բոլոր կարևոր հարցերը որոշվելու են հանրաքվեի, այլ ոչ թե միանձնյա որոշումների միջոցով։
«Հաջորդը տրանսպորտի խնդիրն է, դա ինձ համար պատվի հարց է: Ինձ համար ամոթ է, երբ մեր քաղաքացիները, տարեց մարդիկ կռացած են գնում աշխատանքի, կռացած են գալիս՝ ամռանը շոգելով, ձմռանը մրսելով: Սա ինձ համար արդեն ոչ թե Ա կետից Բ կետ գնալու, այլ պատվի հարց է։ Մեր խնդիրն է հենց սկզբից ձերբազատվել «մարշուտկա» կոչվածներից: Խնդիրը լուծվելու է ներդրումների միջոցով, ամբողջականացվելու է տրանսպորտային ցանցն արդիականացնում են՝ միասնական տոմս ունենալով: Գծերը և գծատերերն իսպառ վերանալու են, լինելու են նոր երթուղիներ, նոր կանգառներ և նոր մենեջմենթ»,- ասաց Մարությանը։
Վերջինս նաև տեղեկացրեց, որ բարձրակարգ ավտոբուսներ են ներմուծելու՝ մեծ, միջին և փոքր: Երկրորդական փողոցներում երթևեկելու են փոքր ավտոբուսները, որոնք հովացման և տաքացման համակարգ են ունենալու: Տրանսպորտային միջոցները նաև հարմարեցված են լինելու հաշմանդամություն ունեցող անձանց համար:
«Նախատեսում ենք նաև մետրոյի առնվազն մեկ կայարան կառուցել՝ Աջափնյակում՝ «Թումոյի» մոտ: Եվ բոլոր տրանսպորտներից հնարավոր է լինելու օգտվել միասնական տոմսով, դա լրիվ նոր կատեգորիայի տոմս է: Այսինքն՝ դուք ոչ թե գնում եք տոմս մի կետից մյուս կետ տեղափոխվելու համար, այլ գնում եք տոմս, որը ժամանակ է: Օրինակ՝ դուք գնում եք տոմս 1 ժամվա, 1 օրվա, 1 ամսվա համար: Եթե դուք ունեք մեկ ժամվա տոմս՝ դուք կկարողանաք օգտվել Երևանի ամբողջ տրանսպորտից, ինչքան ուզեք: Եթե դա հիմիկվա նման անեք՝ ամեն անգամ 100 դրամ տալով, շատ ավելի թանկ կլինի, քան լինելու է այս տոմսը»,- նշեց նա:
Ինչ վերաբերում է աղբահանության խնդրին, Մարությանն ասաց, որ ստեղծվելու է մրցակցային դաշտ, որը կլուծի բոլոր հարցերը․ «Այսօրվա վիճակն առաջացել է այն պատճառով, որ քաղաքային հին իշխանությունները պատշաճ ձևով չեն զբաղվել իրենց գործառույթով, երկրորդը՝ շատ վատ սպասարկում է իրականացնում «Սանիթեկ» ընկերությունը: Մենք պետք է ուսումնասիրենք ոլորտը և մտցնենք 2-րդ կամ 3-րդ օպերատորներ: Մրցակցային դաշտը միանգամից կանի իր անելիքը: Մենք՝ երևանցիներս, պետք է մաքուր պահենք մեր քաղաքը, եթե մաքուր չպահենք, օրը քանի անգամ էլ մաքրեն, միևնույնն է, մաքուր չի լինելու: Դրանից հետո կպահանջենք այդ ընկերություններից, որ իրենք էլ մաքուր պահեն»,- շարունակեց Մարությանը։
Խոսելով վերելակներից՝ Հայկ Մարությանը հայտարարեց, որ Երևանում կա մոտ 4400 վերելակ, որից 4200-ը վթարային վիճակում են:
«Վերելակները պատկանում են շենքին, դե յուրե և դե ֆակտո քաղաքապետարանը այստեղ անելիք չունի, փաստաթղթային լեզվով եթե խոսենք: Բայց հաշվի առնելով մեր ժողովրդի սոցիալական վիճակը՝ քաղաքապետարանը պետք է մասնակից լինի այս վերելակները վերանորոգելու և փոխելու գործում»,- եզրափակեց Հայկ Մարությանը։