Համայնքների խոշորացման գործընթացն առկախվելու է մինչև խորհրդարանական ընտրությունները. Պապիկյան

Հայաստանի տարածքային կառավարման և զարգացման նախարար Սուրեն Պապիկյանն այսօր՝ սեպտեմբերի 13-ին, ընդունել է ԵԽ տարածքային եւ տեղական կոնգրեսի գլխավոր քարտուղար Անդրեաս Կիֆերի գլխավորած պատվիրակությանը, որի կազմում էին ԵԽ տեղական եւ տարածքային իշխանությունների կոնգրեսի քարտուղարության արտաքին հարաբերությունների վարչության ղեկավարի տեղակալ Դմիտրի Մարչենկովը, ԵԽ Երեւանի գրասենյակի ղեկավարի տեղակալ Լորետա Վիոյուն, ԵԽ հայաստանյան գրասենյակի ծրագրի համակարգող Տաթեւիկ Դավթյանը եւ ՀՀ ԱԳՆ ներկայացուցիչ Սուսաննա Ադամյանը:

Նախարարությունից հայտնում են, որ ողջունելով հյուրերին՝ Սուրեն Պապիկյանը բարձր է գնահատել Եվրոպայի Խորհրդի եւ ՀՀ տարածքային կառավարման եւ զարգացման նախարարության միջեւ առկա հարաբերությունների մակարդակը եւ ընդգծել, որ հայկական կողմը շահագրգռված է լավագույնս օգտագործել տարբեր ոլորտներում հնարավոր համագործակցության ներուժը։

Նախարարը կոնգրեսի պատվիրակներին մանրամասն ներկայացրել է տարածքային եւ տեղական կառավարման վերաբերյալ ներկա իշխանությունների պատկերացումներն ու զարգացման տեսլականը, եւ նշել․ «Հայաստանում ամբողջական ժողովրդավարություն ունենալու հիմքը տեղական մակարդակում ժողովրդավարության բարձրացումն ու ինքնուրույնության աճն է։ Պետական կառավարման համակարգ-ՏԻՄ կապն ավելի դյուրին կդառնա, երբ ՀՀ-ում ավարտված կլինեն վարչատարածքային բարեփոխումները, ինչի նպատակով առաջիկայում նախատեսվում են տարածքային կառավարման հարթությունից որոշակի լիազորությունների պատվիրակում համայնքներին»։

Անդրադառնալով համայնքների խոշորացման գործընթացին` նախարար Սուրեն Պապիկյանը հայտնել է, որ ոլորտի քաղաքականության պատասխանատուների կողմից որոշվել է գործընթացն առկախել մինչեւ արտահերթ խորհրդարանական ընտրությունների անցկացումը։ Նախարարը որոշումը պայմանավորել է նախկինում կատարված բարեփոխումների ընթացքում արձանագրված բացթողումներից հնարավորինս զերծ մնալու, դրական եւ բացասական կողմերը վերլուծելու անհրաժեշտությամբ։ Եզրափակելով՝ Սուրեն Պապիկյանը հատուկ շնորհակալություն է հայտնել GIZ-ին, UNDP-ին, Շվեյցարական զարգացման գործակալությանը Հայաստանի համայնքների կարողությունների զարգացման եւ տեղական ինքնակառավարման ինստիտուցիոնալացման գործում ցուցաբերած մեծ աջակցության համար։

Իր հերթին ԵԽ տարածքային եւ տեղական կոնգրեսի գլխավոր քարտուղար Անդրեաս Կիֆերը շնորհակալություն է հայտնել ընդունելության համար եւ շեշտել, որ Հայաստանի Հանրապետությունը ԵԽ-ի կարեւոր գործընկերներից է, եւ Խորհուրդը պատրաստակամ է այսուհետ եւս օժանդակել երկրում ծավալվող ժողովրդավարության կոնսոլիդացիայի գործընթացին։ Անդրեաս Կիֆերը ափսոսանք է հայտնել ԵԽ-ի կողմից Երեւանի քաղաքապետի արտահերթ ընտրություններին ռեսուրսների սղության պատճառով դիտորդական առաքելություն չիրականացնելու առնչությամբ եւ դա բացառապես պայմանավորել նույն ժամանակահատվածում Բոսնիա-Հերցեգովինիայի անցկացվող ընտրությունները դիտարկելու հրավերն ավելի վաղ ընդունելու հանգամանքով։

Նախարար Սուրեն Պապիկյանը, կարեւորելով ԵԽ մոնիտորինգային գործառույթները, հույս է հայտնել, որ առաջիկա խորհրդարանական ընտրություններին ԵԽ դիտորդական առաքելությունը կցուցաբերի իր ակտիվ մասնակցությունը։ Ամփոփելով նախարարը համոզմունք է հայտնել, որ տարածքային եւ տեղական մակարդակների տարբեր ոլորտներում ԵԽ-ի եւ ՀՀ-ի համագործակցության ողջ ներուժը լավագույնս օգտագործելու միջոցով առաջիկայում հնարավոր կլինի բարեհաջող ավարտին հասցնել սկսված վարչատարածքային բարեփոխումները եւ տեղերում ունենալ մասնակցային ժողովրդավարության վրա հիմնված ինքնուրույն համայնքներ։