Գաղտնալսումը իր էֆեկտը չունեցավ. Դրանք կարող են հեռուստասերիալի պես շարունակություն ունենալ. Ֆելիքս Ցոլակյան
ԱԱԾ-ՀՔԾ ձայնագրությունը հրապարակելը հակապետական քայլ էր, մտահոգիչն այն է, որ կարող է շարունակություն ունենալ՝ հեռուստատեսային սերիալների պես, վաղը մյուս օրը կարող են մեկ ուրիշ ձայնագրություն էլ հրապարակել, հետո ուրիշը, ավելի վատ է, որ շարունակություն ունենա: Այս մասին այսօր՝ սեպտեմբերի 13-ին ասաց ԱԺ պատգամավոր, ԱԱԾ նախկին տնօրենի տեղակալ (2007-2013) Ֆելիքս Ցոլակյանը՝ ԱԺ-ում, լրագրողների հետ ճեպազրույցում:
«Եթե շարունակություն չունենա, սա այսպես կավարտվի, կգնա, բայց եթե հանկարծ շարունակություն եղավ, դա վտանգավոր բան է»,-ասաց պատգամավորը:
Նրա կարծիքով, հրապարակման նպատակը ոչ միայն անհատների, այլև պետության վարկաբեկումն էր. «Ես համարում եմ, որ առաջին հերթին պետության դեմ քայլ է, որովհետեւ անհատների դեմ քայլը իր էֆեկտը չունեցավ, իսկ պետությանը իրապես վնաս հասցրեց»։
Լրագրողի հարցին՝անհատի, թե կազմակերպության ձեռքի գործ է, Ցոլակյանը պատասխանեց՝ ավելի շատ առաջինը, բայց քննությունը ցույց կտա:
Ճշտող հարցին, կարող է անհատը այդ կարգի գաղտնալսող սարքավորում ունենալ, պատգամավորը դրական պատասխանեց. «Եթե ունի ֆինանսական մեծ հնարավորություններ, կարող է ունենալ նաև այդ սարքավորումները: Նույնիսկ պետություններ կան, որ չունեն այդ սարքավորումները»։
Ֆելիքս Ցոլակյանը հաստատեց, որ այդ մասին ԱԱԾ-ն կարող էր և չիմանալ. «Հնարավոր է, մեկը բերել, դրել է իր մառանում»։
Պատգամավորը հայտնեց, որ գաղտնալսման 15 տարբերակ կարող է թվել, բայց դրանցից որևէ մեկը չցանկացավ առանձնացնել, որովհետև ասաց, որ չգիտի՝ով է եղել:
Դիտարկմանը՝ ում է ձեռնտու ձայնագրության տարածումը, Ֆելիքս Ցոլարկյանը պատասխանեց. «Եթե շատ խորը մտածես, կարող է շատ շատերին ձեռնտու չլիներ էլ, ում անունը հիմա տալիս են, կառույցների կամ կուսակցությունների: Ձեռնտու կարող էր լինել նաև երրորդ ուժի, չեմ կարող ասել»։
Նա հիշեցրեց, որ շատ հզոր պետությունների՝ ԱՄՆ-ի, Գերմանիայի, Ֆրանսիայի, Թուրքիայի ղեկավարներին էլ են գաղտնալսել. Գերմանիայի կանցլերին, օրինակ, լսել են 10 տարի:
Գաղտնասլված խոսակցության բովանդակության մեջ Ցոլակյանը առանձնապես խնդիր չի տեսնում. «Աշխարհը շուռ չի եկել, սա աղմուկ է ոչնչից»։
Լրագրողի դիտարկմանը՝ խնդիր չի տեսնում, որ ԱԱԾ ղեկավարը դատավորին ասում է՝ ուզես-չուզես պիտի կալանավորես, Ցոլակյանը պատասխանեց՝ ոչ. «Եթե մի քիչ ավելի ուշադիր լսենք խոսակցությունը այդ խոսքը միշտ ասում է հետևյալ բառերից հետո՝ հիմքեր կան, ամուր են և այլն»։
Անդրադառնալով ռուսներից վախենալու մասին հարցին, Ֆելիքս Ղոլակյանն ասաց՝ վախենալ չէ, ավելի շատ զգուշանալ է. «Եվ ես դրա մեջ տեսնում եմ դրական բան, որ ԱԱԾ ղեկավարը այդ խոսքը ասում է, որ ՀԱՊԿ ղեկավարին ձերբակալելը պրոբլեմ է և երեկ վարչապետը, երբ բացատրեց, թե ինչպես է եղել, որ Խաչատուրովը չի կալանավորվել, ճիշտ են արել»։
Անդրադառնալով Միքայել Հարությունյանի՝ Ռուսաստանի քաղաքացի լինելուն և Հայաստանում ՊՆ պաշտոնը զբաղեցնելուն, Ֆելիքս Ցոլակյանն ասաց. «Եթե ինչ-որ մեկը լինելով Ռուսաստանի քաղաքացի, Հայաստանում ղեկավար պոստ է զբաղեցրել, ես դա շատ բացասական եմ գնահատում»։