Ապօրինի ծառահատման դեպքերի վերաբերյալ հերթական 2 քրեական գործերն են ուղարկվել դատարան

Լոռու մարզում ապօրինի ծառահատումների դեպքերի առթիվ հարուցված երկու քրեական գործի նախաքննությունն ավարտվել է:

Գլխավոր դատախազության հանրային կապերի բաժնից հաստատեցին տեղեկությունն ու մանրամասներ հայտնեցին:

Մասնավորապես «Հայանտառ» ՊՈԱԿ «Եղեգնուտի անտառտնտեսություն» մասնաճյուղից ստացված անտառխախտման արձանագրության հիման վրա նախապատրաստված նյութերով 2018թ. հունիսի 25-ին ՀՀ ոստիկանության Լոռու մարզային վարչության Գուգարքի բաժնում ՀՀ քրեական օրենսգրքի 296-րդ հոդվածի 3-րդ մասով հարուցվել է քրեական գործ:

Նախաքննության ընթացքում ձեռք են բերվեն բավարար ապացույցներ այն մասին, որ 2018թ. մարտից մինչև հունիսի 15-ն ընկած ժամանակահատվածում «Հայանտառ» ՊՈԱԿ «Եղեգնուտի անտառտնտեսություն» մասնաճյուղի Փամբակ անտառպետության թիվ 4 պահաբաժնի տարածքում ապօրինի հատվել են տարբեր տրամագծի ընդհանուր թվով 19 հատ ծառ, որից՝ 15-ը հաճարենի, 2-ը թեղի, 1-ը ուռենի, 1-ը բոխի տեսակի: Ապօրինի հատման հետևանքով բուսական աշխարհին պատճառված վնասի չափը կազմել է 1 մլն 773 հազար դրամ:

Մյուս քրեական գործը ՀՀ Լոռու մար¬զային քննչական վարչությունում հարուցվել է ՀՀ քրեական օրենսգրքի 296-րդ հոդվածի 3-րդ մասով՝ 2018թ. հունիսի 5-ին ոստիկանության Գուգարքի բաժին տեղափոխված «Կամազ» մակնիշի ավտոմե¬քենայի բեռնաթափքում ապօրինի ծառահատ¬ման հետևանքով ստացված «հաճա¬րենի», «լորենի», «թեղի» և «կաղնի» տեսակի ընդհանուր 20.4 խ/մ ծավալի փայտանյութի հայտնաբերման դեպքի առթիվ: Ըստ կատարված հաշվարկի՝ ապօրինի այս ծառահատման հետևանքով բուսական աշխարհին պատճառվել է առանձնապես խոշար չափերի՝ 734.400 ՀՀ դրամի վնաս:

Քրեական գործերի նախաքննության ընթացքում ձեռք բերված ապացույցների բավարար համակցությամբ նշված առաջին քրեական գործով մեկ անձի մեղադրանք է առաջադրվել ՀՀ քրեական օրենսգրքի 296-րդ հոդվածի 3-րդ մասի հատկանիշներով, իսկ նշված երկրորդ քրեական գործով՝ մեկ անձի մեղադրանք է առաջադրվել ՀՀ քրեական օրենսգրքի 296-րդ հոդվածի 2-րդ մասի 3-րդ կետի հատկանիշներով:

Առաջադրված մեղադրանքներում նշված անձինք իրենց լիովին մեղավոր են ճանաչել: Սակայն եթե առաջին քրեական գործով բուսական աշխարհին պատճառված վնասը չի հատուցվել, երկրորդով վերականգնվել է ամբողջությամբ:

Մինդատական վարույթի օրինականության նկատմամբ հսկողություն իրականացնող դատախազների կողմից հաստատվել են մեղադրական եզրակացությունները և քրեական գործերի հետ միասին ուղարկվել Լոռու մարզի ընդհանուր իրավասության դատարան: