Հայկ Մարությանի՝ «քայլերը» քաղաքապետ ընտրվելու դեպքում

Սեպտեմբերի 23-ին հեղափոխության շնորհիվ ունենալու ենք ազատ, արդար եւ թափանցիկ ընտրություններ։ Այս մասին այսօր՝ սեպտեմբերի 12-ին Երեւանի Քանաքեռ-Զեյթուն վարչական շրջանում քարոզարշավի ժամանակ հայտարարեց «Իմ քայլը» դաշինքի քաղաքապետի թեկնածու Հայկ Մարությանը։

«Մենք ապրում ենք պատմական շրջան, որովհետեւ արդեն 2 տասնյակ տարի չենք ունեցել ազատ, արդար եւ թափանցիկ ընտրություններ: Իսկ այդ օրը՝ սեպտեմբերի 23-ին, շնորհիվ հեղափոխության, որ դուք արեցիք, ունենալու ենք ազատ, արդար եւ թափանցիկ ընտրություններ»,- հայտարարեց նա։

Հայկ Մարությանի խոսքով՝ որպես ժողովրդի կատարած հեղափոխության գաղափարական շարունակություն՝ ստեղծվել է «Իմ քայլը» դաշինքը, որը ներկայացնում է իր ավագանու անդամներին. «Որոշ մարդիկ մտածում են, որ կարող են ժողովրդի ձեռքից խլել այս հաղթանակը, ես իրենց ասում եմ՝ չեք կարող, չի լինի»։

«Իմ քայլը» դաշինքի քաղաքապետի թեկնածուն ներկայացրեց նախընտրական ծրագրի 50 կետերը:

Հիմնական 9 դրույթները Մարությանը ներկայացրեց քայլերի տեսքով. «Քայլ առաջին՝ ուղիղ ժողովրդավարություն հանրաքվեների միջոցով: Քայլ 2-րդ՝ տրանսպորտ. սա ինձ համար մեր պատվի հարցն է, պետք է ձերբազատվենք «Գազել» կոչվածներից: Արդիականացնում ենք ամբողջ ցանցը, միասնական տոմս, ճկուն զեղչային համակարգ, գծերը վերանալու են, ավելացնելու ենք մետրոյի մեկ կանգառ Թումոյի մոտ: Քայլ 3-րդ՝ աղբահանություն. մենաշնորհ ունենք՝ 1 օպերատոր, պետք է մտցնենք 2-րդ, 3-րդ օպերատոր: Քայլ 4-րդ՝ համատիրություններ, վերելակներ: Քայլ 5-րդ՝ մանկապարտեզներ. սնունդը պետք է կարգավորվի: Քայլ 6-րդ՝ պոլիկլինիկաներ: Քայլ 7-րդ՝ դպրոցներ: Քայլ 8-րդ՝ բնապահպանություն, կանաչապատում: Քայլ 9-րդ՝ տուրիզմ»։

Հայկ Մարությանը վստահեցրեց, որ «Իմ քայլը» դաշինքն ունի այս ամենն իրականացնելու քաղաքական կամք։