Պետք է լինի քաղաքացիական բարձր գիտակցություն, որ մարդիկ դուրս գան իրենց տներից և գնան ընտրատեղամասեր. Մարուքյան

Ես հորդորում եմ սեպտեմբերի 23-ին գնալ ընտրատեղամասեր, որովհետև ես զգում եմ, որ հնարավոր է՝ ունենանք ընտրողների ցածր մասնակցություն։ Այս մասին այսօր՝ սեպտեմբերի 11-ին Մալաթիա-Սեբաստիա վարչական շրջանում ընտրողների հետ հանդիպմանը հայտարարեց Երևանի ավագանու ընտրություններում «Լույս» դաշինքի առաջնորդ, ԱԺ «Ելք» խմբակցության պատգամավոր Էդմոն Մարուքյանը։

Պատգամավորի խոսքով՝ այդ օրը բոլորը հույսը դնելու են մյուսների վրա. կմտածեն, որ եթե իրենք չգնան, մեկ ուրիշը կգնա: «Չկա վարչական ռեսուրս, չկան փող բաժանողներ, իսկ բաժանողներին անպայման պետք է բռնել, պետք է լինի քաղաքացիական բարձր գիտակցություն, որ մարդիկ դուրս գան իրենց տներից և գնան ընտրական տեղամասեր»,- հայտարարեց Մարուքյանը։

«Հանրապետություն» կուսակցության քաղխորհրդի նախագահ, ԱԺ «Ելք» խմբակցության պատգամավոր Արամ Սարգսյանն էլ իր ելույթում լուրջ ձեռքբերում համարեց այն, որ Երևանի քաղաքապետի ընտրություններում մեծ թվով թեկնածուներ կան. «Հիշու՞մ եք՝ նախկինում երեք մարդ էր թեկնածություն դնում, իսկ հիմա տասը մարդ. սա արդեն արդեն լուրջ առաջընթաց է»:

Արամ Սարգսյանը երևանցիներին հորդորեց քվեարկել իր ընկերոջ՝ Լույս» դաշինքից քաղաքապետի թեկնածու Արտակ Զեյնալյանի օգտին։

«Արտակ Զեյնալյանն աննկարագրելի անաչառ մարդ է: Իր մոտ նույնիսկ չի անցնում իր ամենամոտ ընկերոջ՝ իմ խոսքը, երբ խնդիրը վերաբերում է անաչառությունը»,- նշեց նա:

Արամ Սարգսյանն ասաց՝ չի ափսոսում, որ Արտակ Զեյնալյանը, քաղաքապետ ընտրվելու դեպքում, կթողնի արդարադատության նախարարի պաշտոնը. «Բացարձակ չեմ ափսոսում, որովհետև վստահ եմ, որ Երևանի քաղաքապետ ընտրվելու դեպքում Զեյնալյանն աշխատելու է նույն անաչառությամբ և նույն նվիրումով»,- հայտարարեց նա։

Քաղաքապետի թեկնածու Արտակ Զեյնալյանն էլ այսօր հերթական անգամ հայտարարեց, որ, Երևանի քաղաքապետ ընտրվելու դեպքում, պատրաստ է հրաժարվել նախարարի պաշտոնից:

«Պատասխանեմ հարցին՝ արդարադատության նախարար, թե՞ Երևանի քաղաքապետ. ես ընտրել եմ Երևանը»,- հայտարարեց նա։

Նրա խոսքով՝ Երևանը տարիներ շարունակ քայքայվել է, քանի որ քաղաքի զարգացման համար բավարար միջոցներ չեն ներդրվել: «Այս կամ այն պատճառով մենք Երևանի պահպանության վրա միջոցներ չենք ներդրել։ Իսկ պահպանություն նշանակում է զարգացում։ Եթե դու չես ապահովում զարգացումը, ապա այն քայքայվում է, և որպեսզի մենք կարողանանք կասեցնել այս քայքայումն ու առաջընթաց ապահովել, պետք է ոչ դասական մի բան անենք»,- ասաց նա։

Հիշեցնենք, որ սեպտեմբերի 23–ին կայանալիք Երևանի ավագանու արտահերթ ընտրություններին մասնակցում է 12 քաղաքական ուժ՝ «Բարգավաճ Հայաստան», «Երկիր Ծիրանի», «Ժառանգություն», «Ժողովրդական ուղի», «Հայ Յեղափոխական դաշնակցություն», «Հայք», Ռեֆորմիստների և «Օրինաց երկիր» կուսակցություններն ու «Երևանի հանրություն», «Իմ քայլը», «Երևանցիներ» և «Լույս» դաշինքները: