Հեսա ձեզ ընենց Յութուբում տեղադրենք, որ չկարողանաք դուրս գաք. Փաշինյան (տեսանյութ)
«Չեք շտապում չէ՞, ես էլ չեմ շտապում»,- այսպես սկսեց գաղտնալսման սկանդալի մանրամասներին անդրադարձը ՀՀ վարչապետ Նիկոլ Փաշինյանն այսօր՝ սեպտեմբերի 11-ին «Իմ քայլը» դաշինքի հանրահավաքի ժամանակ:
Վարչապետը հավաքվածներին խնդրեց ենթադրել, որ բոլոր ներկաների հեռախոսները գաղտնալսվել են, քանի որ բոլորն ամենօրյա խոսակցության մեջ անխուսափելիորեն ասում են տարբեր նախադասություններ, բառեր, բարկության պահին ինչ-որ բան, լավ տրամադրության պահին՝ ինչ-որ բան։ Խնդրեց պատկերացնել, որ մարդիկ են հայտնվել, որոնք հավակնում են բոլորի խոսակցությունները ձայնագրել և տեղադրել Յութուբում. «Էսա մենք ձեզ նենց Յութուբում տեղադրենք, որ էլ չկարողանաք Յութուբից դուրս գաք ընդհանրապես»։
Նիկոլ Փաշինյանը հիշեցրեց իր ասուլիսը, երբ ասաց՝ վախենում է՝ չկարողանա կոմպրոմիսի գնալ կոռուպցիայի, ապօրինության հետ. «Եվ հիմա էս իրավիճակն ա, որովհետև վերջին 4 ամսում ի՞նչ ա տեղի ունենալու։ Հա դե՝ լավ, բան ա, եղել ա, մի բան անենք, մի բան ըլնի, էսքան փող ունենք, էսքան բիզնես ունենք, էսքան հնարավորություններ ունենք, Յութուբի կանալներ ունենք, հեռուստատեսություններ ունենք, թերթեր ունենք, իսկ դու քո հաշվին մի հազար դոլար ունես ընդամենը, դու ո՞նց ես մտածում, որ մեր դեմ կարող ես ինչ-որ բան անել։ Իհարկե՝ անմիջական չէր այս խոսակցությունը, սրանք կոնտեքստ են թերթերով, հարցազրույցներով, խաբարներով, դեմքի արտահայտություններով, բայց ես ուզում եմ ասել, որ ձեր դեմ ես չեմ պայքարում, մենք ընդհանրապես ձեր դեմ չենք պայքարում, մենք պայքարում ենք հանուն ճշմարտության և օրինականության։ Եվ այդ պայքարի տերը ժողովորդն է, ՀՀ քաղաքացին»։
Վարչապետը հիշեցրեց, որ վերջին 4 ամսվա ընթացքում իր անվտանգությունը պահպանելու տասնյակ հրապարակումներ, կոչեր, պահանջներ են եղել։ Իհարկե՝ ՊՊԾ-ն իր անվտանգությունը պահպանում է, բայց հարմար գտավ նաև ասել հետևյալը. «Ժողովուրդ ջան, ձեր ասած պոտենցիալ մարդասպանները, գիտեք, իմ կարծիքով, լավ են հասկանում, որ ինչքան էլ ես, որպես վարչապետ, ըստ էության հակակոռուպցիոն քաղաքական պայքարը ղեկավարում եմ ձեր անունից և ձեր մանդատով, բայց պատկերացնում եք՝ ինչ տեղի կունենա նրանց հետ, եթե ինձ հետ ինչ-որ բան տեղի ունենա։ Ձեր նշած բազմաթիվ մարդկանց ուղղակի մարդիկ տնից կհանեն, փողոցներում սամասուդի կենթարկեն, և նրանք դա չեն կարող չհասկանալ, որ ճիշտ է՝ ես ապահովում եմ իրենց դեպի բանտ գնալու ճանապարհը, բայց մյուս կողմից էլ ես իրենց անվտանգության միակ երաշխավորն եմ, որովհետև եթե ինձ բան պատահի, իրենց հետ շատ ավելի վատ բաներ կպատահեն ժողովրդի կատարմամբ»։
Նիկոլ Փաշինյանն ասաց՝ ցանկացած թիկնազոր կարելի է հաղթահարել, ի վերջո՝ նույնիսկ ԱՄՆ նախագահի են սպանել, բայց իր անվտանգության երաշխավորը ժողովուրդն է, և ինքն էլ, իհարկե, ժողովրդի անվտանգության երաշխավորն է. «Սա ուզում եմ ասել, որովհետև կռահում եմ, որ այս նոր իրադարձությունից հետո էլի ասելու են՝ վայ, զգույշ եղիր, քեզ չխփեն, չթունավորեն, չկտրտեն, ավտոյի տակ չգցեն և այլն։ Ժողովուրդ ջան, դուք եք այդ պայմանը ապահովում՝ այս մթնոլորտով, և ես շնորհակալ եմ, ուրախ եմ, որ ծառայում եմ ձեզ»:
Մանրամասն՝ տեսանյութում: